• Aguesta formacion començarà eth pròplèu dimèrcles 3 d’abriu, s’amiarà a tèrme de manèra telematica e dejà ei dubèrt eth termini d’inscripcion entà quinsevolh hemna dera Val d’Aran interessada

• Aguest cors forme part deth Programa Hilat de Lidèrs dera ADESP, laguens der hilat Sportnet4Women, e eth govèrn deth Conselh Generau d’Aran s’i a hijut damb er objectiu de arténher er objectiu d’impulsar era preséncia de hemnes en lòcs directius en mon der espòrt

Eth govèrn deth Conselh Generau d’Aran, amassada damb era ADESP, era Associacion der Espòrt Espanhòu, a organizat un programa de formacion entà hemnes que son interessades en èster dirigents esportives, entrenadores o realizar quinsevolh auta foncion laguens deth sector esportiu.

Eth cors s’iniciarà eth 3 d’abriu, constarà de 20 ores e serà en format telematic. Eth termini d’inscripcion entà quinsevolh hemna interessada ei dejà dubèrt en següent ligam: https://www.sportnet4women.es/rdl-aran

Eth programa ei compausat per quate moduls enfocadi toti eri ath sector der espòrt: aprenedissatge de soft skills o abilitats personaus, gestion de projèctes, casi d’èxit inspiradors e un darrèr modul en que s’expliquen es estructures d’organizacion esportiva en país.

Eth conselhèr d’Espòrts, Javier Cavero, manifestaue que “impulsar era formacion des hemnes ena gestion esportiva e fomentar qu’agarren eth lideratge enes entitats esportives ei un ahèr clau entà afavorir ua igualtat efectiva en aguest airau” e higie que: “deth sòn lideratge se veirà afavorit er increment de hemnes en d’auti estaments deth sector”.