• Eth pròplèu 14 de junhsèga, eth Conselh Generau d’Aran a organizat ua jornada damb activitats ludiques e divulgatives centrades en transitar cap a un modèl energetic mès sostenible e respectuós damb eth miei ambient

Eth govèrn deth Conselh Generau d’Aran se hig ara campanha prebotjada pera Generalitat de Catalunya a trauès der Institut Catalan d’Energia (ICAEN) damb motiu dera Setmana Europèa dera Energia Sostenibla e organize, entath dia 14 de junhsèga, era prumèra Jornada dera Energia Sostenibla en Aran.

“Dera maxima institucion aranesa ençà ja hè ans qu’apostam pera implementacion de hònts d’energia renauibles en nòste territòri e trabalham entà poder trèir profit dera biomassa des nòstes montanhes entà arténher energia neta e, ath madeish temps, suenhar es nòsti bòsqui e evitar era propagacion d’incendis de siesau generacion” manifestaue era sindica d’Aran, Maria Vergés, en tot híger que: “tanben auem un convèni damb er Institut Cartografic e Geologic de Catalunya entà impulsar un projècte de climatizacion urbana de heired e calor que pogue dar cobertura diuèrsi equipaments e edificis de Vielha per miei d’ua ibridacion d’energia geotermica”.

En aguesta Jornada dera Energia Renovabla s’amiaràn a tèrme activitats dirigides ara mainadèra coma eth circuit de mòtos electriques patrocinat per Electric Riders entà méter en practica era mobilitat sostenibla o un jòc sus eth foncionament des plaques solars, patrocinat per Arantec, entre d’autes.

Atau madeish, i aurà tanben activitats informatives coma era exposicion sus era reabilitacion e era certificacion d’eficiéncia energetica, era session “Divulgacion de comunitats energetiques” o era taula redona sus eth camin cap ara transicion energetica. Entad aguestes dues darrères activitats, serà de besonh hèr ua inscripcion prèvia en tot confirmar assisténcia en email s.caubet@aran.org.

“Eth compromís d’aguest govèrn ei transitar tà un modèl energetic mès net, en tot impulsar es energies renauibles, disminuir er usatge e dependéncia des energies fossils e contribuir atau ara eliminacion dera peada de carbòni, cercant arténher un futur mès sostenible e respectuós damb eth miei ambient”, asseguraue eth conselhèr de Gestion Ambientau e Transicion Energetica, Oriol Sala.