• Er Hestau s’inclodirà laguens des actes dera Hèsta d’Aran e permeterà qu’eth 17 de junh age tanben un caractèr popular e participatiu des entitats culturaus deth país.

• Era sindica d’Aran, Maria Vergés, a presentat publicament aguest maitin era prumèra edicion der hestau “Terson. Eth son dera Tèrra” organizat peth Conselh Generau d’Aran entà prebotjar e balhar supòrt ara produccion culturau en territòri, restacada ara lengua e ath Pirenèu.

Era sindica d’Aran, Maria Vergés, ven de presentar, aguest maitin, ena sedença deth Conselh Generau, “Terson. Eth son dera tèrra”, eth prumèr hestau dedicat ara cultura, lengua e musica en Aran, autant en aranés coma en d’autes varietats der occitan e damb tematica restacada ath Pirenèu.

Tad aguesta prumèra edicion s’an programat activitats totes eres restacades damb era lengua e era tèrra, exposicions, presentacions de libres , activitats entàs familhes e tanben se poiràn veir pèces de teatre e teatre musicau damb entitats que son consolidades en territòri, concèrts en aranés e occitan, damb grops coma Sarabat, Rambalh o Parpalhon. Atau madeish, eth grop “La Ronda de Boltaña” qu’arribe deth Pirenèu aragonés, participarà tanben d’aguest hestau.

Era sindica a afirmat: ”Aguesta a d’èster era prumèra pèira entà impulsar era creacion culturau deth país, en aranés, en occitan, e dehòra ath long des Pirenèus, ath delà de consolidar es actes mès hestius dera Hèsta d’Aran, qu’amasse tant es parts mès institucionaus damb es mès populares”.

E a hijut:” Ara trabalham tà qu’aguest nau projècte culturau  pogue tanben replicar-se ena tardor, coma recors tanben toristic que dongue a conéisher era nòsta identitat e cultura e ad aqueres entitats que i trabalhen. Tanben vò, èster un referent en çò que hè a ara activitat culturau entà hèr a arribar tot aguest tipe d’actes ara ciutadanetat en generau”