• Se destinaràn 304.452 èuros annaus degut ar increment de servicis ena cirurgia ortopèdica, traumatologia e oncologia que preste er Espitau Val d’Aran
Imatge d’archiu deth sindic d’Aran, Carlos Barrera.
Eth Govern dera Generalitat a aprovat eth decrèt que permet agranir era aportacion economica dera Generalitat entath finançament des competéncies transferides ath Conselh Generau d’Aran ena matèria de sanetat. Er impòrt dera ampliacion ei de 304.452 èuros annaus, destinadi a hèr tèsta ar increment deth numerò e dera complexitat des accions sanitàries ena cirurgia ortopèdica, traumatologia e oncologia que preste er Espitau Val d’Aran.
Damb aguest decrèt, eth Govern ratifique er acòrd adoptat pendent era reünion dera Comission Bilaterau Govern dera Generalitat- Conselh Generau d’Aran, presidida pera conselhèra de Governacion e Relacions Institucionaus, Meritxell Borràs, e eth sindic d’Aran, Carlos Barrera, eth 29 de junhsèga de 2015.
Era Comission Bilaterau Govern dera Generalitat – Conselh Generau d’Aran ei er organ permanent de relacion entre es govèrns e es administracions dera Generalitat e d’Aran e a entre es sues foncions era adopcion des acòrds de transferéncia de competéncies o traspassi de bens e servicis que corresponen.
Carlos Barrera, sindic d’Aran, a manifestat “damb aguest ampliament dera aportacion economica ena sanitat se garantís era contunhitat a un servici essenciau”. Barrera a hijut “eth Govèrn aranés priorize eth trabalh dirigit a establir un modèl de finançament estable e beneficiós tath país, ei basic entara Val d’Aran, peth desplegament deth sòn autogovèrn e peth benéster des nòsti vesins e vesies”.
Eth calcul d’aguesta dotacion economica s’a establit entà tota era anualitat e aguest acòrd ei efectiu a compdar der 1 de gèr de 2015. Entar exercici 2015, aguest impòrt anarà a cargue deth Departament de Salut. Entà exercicis futurs, aguest impòrt s’incorporarà ath capítol especific des Pressupòsti dera Generalitat entath finançament deth Conselh Generau d’Aran, e anarà a cargue deth Departament competent ena matèria de relacions entre era Generalitat e eth Conselh.