• Eth govèrn d’Aran vò proporcionar foncionalitat ad aguestes installacions pendent es pròplèus tempsades d’ostiu, en tot dinamizar atau aguesti endrets, que supausen grani atractius toristics, e aufrir un bon servici as persones que les visiten

Eth govèrn deth Conselh Generau d’Aran a trabalhat aguest ostiu ena reabilitacion e renauiment intèrn e extèrn des refugis dera Bassa d’Oles, eth Saut deth Pish e eth Plan Batalhèr.

“Aguestes installacions se trapauen en un estat fòrça deteriorat e auien de besonh ua intervencion immediata”, afirme eth conselhèr de Territòri, Paisatge e Gestion Ambientau, Francés Bruna, que hig que: “des deth govèrn deth Conselh Generau d’Aran, volem proporcionar foncionalitat ad aguesti refugis e dar era possibilitat de crear tres naui lòcs de trabalh entà gestionar-les pendent es tempsades d’ostiu. D’aguesta forma, ath còp que dinamizam aguesti paratges, que son un fòrt atractiu toristic,  prebotjam tanben era aucupacion en territòri”.

Deth mes de junhsèga ençà, efectius dera brigada de servicis deth Conselh Generau d’Aran (SAVA) an pintat e apraiat er exterior e interior d’aguesti tres refugis, an reformat e netejat es banhs, an reparat es tets e s’a hèt ua naua captacion d’aigua entath refugi dera Bassa d’Oles, entre d’autes accions. Ara, se trabalhe enes captacions d’aigua des refugis deth Saut deth Pish e Plan Batalhèr entà deishar totaument renauides aguestes tres installacions.

Cau rebrembar qu’aguesti trabalhs s’an hèt possibles gràcies ar aument de personau qu’amièc a tèrme aguest ostiu era maxima institucion aranesa entà ampliar eth servici dera sua brigada e afavorir atau era dinamizacion economica deth territòri dempús dera crisi sanitària, sociau e economica deth COVID-19.