Eth govèrn deth Conselh Generau inície era estrategia Aran Accion 20/30 damb era conferéncia sus torisme post COVID-19

En aguesta prumèra amassada, ara quau assistiren 130 persones, participèren eth Sindic d’Aran, es conselhèrs d’Economia, Torisme e Promocion Economica e expèrts deth sector, que parlèren sus era situacion deth torisme aranés dempús dera crisi sanitària e deth besonh de reinventar-se e diversificar era economia deth territòri de forma collaborativa, compdant damb es aportacions des ciutadans e empresaris d’Aran

Pendent era tarde s’ager auec lòc era conferéncia “Eth torisme ena Val d’Aran en tempsi de COVID-19 e post COVID-19: rèptes e oportunitats”, era prumèra accion dera estrategia deth govèrn deth Conselh Generau, Aran Accion 20/30.

Aguesta amassada supause er inici deth procès de debat e collaboracion entre eth Conselh Generau d’Aran e es professionaus e persones relacionades damb eth sector toristic dera Val d’Aran, entà trabalhar de forma conjunta en replantejament deth torisme e era economia deth territòri.

“Aguesta amassada respon ara situacion excepcionau generada pera crisi deth COVID-19, ua crisi sanitària qu’ara a ua repercussion socioeconomica qu’afectarà ath sector toristic, e mos semble qu’en aguest moment, un còp superada era fasa mès aguda dera crisi sanitària, mos cau méter en accion entà palliar er efècte qu’aurà sus era economia”, afirme eth Sindic d’Aran, Francés Boya, que hig que: “volem afrontar aguesta crisi amassa damb eth sector toristic, en tot definir ua estrategia entà diversificar era nòsta economia e plantejar-mos naues alternatives”.

En aguesta prumèra amassada, ara quau assistiren 132 persones, i participèren eth Sindic d’Aran, es conselhèrs d’Economia, Torisme e Promocion Economica, Juan Antonio Serrano e Josep Canut, eth president deth Grèmi d’Ostalaria, Xacobe Bartolomé, era responsable de Torisme Val d’Aran, Marisol Ariño, e eth director d’Innova Management, Rainer Brusis.

Pendent aguesta conferéncia se tractèren ahèrs coma era situacion d’incertesa deth torisme nacionau e locau dempús dera crisi sanitària, possibles accions entà atrèir toristes a cuert termini, cambis de paradigma a miei e long termini e es rèptes e oportunitats que se presentaràn en torisme e ena economia aranesa un còp artenhuda era naua normalitat.

A compdar d’aguest prumèr contacte, s’organizaràn quate grops de trabalh segontes es diferents sectors: ostalaria e lotjaments, restauracion, comèrç e empreses d’activitats. Se harà arribar un mail as persones inscrites en aguesta iniciativa entà saber en quin grop de trabalh vòlen participar e, çò de mès lèu possible, se començarà a trabalhar entà cercar alternatives qu’ajuden ath torisme aranés a superar aguesta crisi.

Cau rebrembar qu’era estrategia Accion Aran 20/30 compde tanben damb un aute procès de debat ciutadan entà trapar linhes de trabalh e possibles accions mès enlà deth torisme entà dar responsa as besonhs economics deth moment. Era passada setmana eth Conselh Generau lancèc un qüestionari sus es interèssi e preocupacions dera ciutadania, qu’an responut mès de 200 persones. Aguesta tarde, tàs 17 ores, aurà lòc era presentacion virtuau d’aguesta estrategia de futur.

Entath govèrn deth Conselh Generau d’Aran, aguestes iniciatives an d’èster eth punt de partida d’un procès de mès long recorrut que permete generar un plan d’accion entà desvolopar un modèl territoriau de futur entara Val d’Aran.