• Aguest anonci respon ath compromís der Estat tara melhora d’aguesta carretèra atau coma manifestèc eth passat mes de seteme eth secretari generau d’infraestructures der Estat ena sua visita tath Conselh Generau d’Aran
• Eth govèrn d’Aran mòstre era sua satisfaccion per anonci de licitacion deth projècte
Eth Ministèri de Transpòrts, Mobilitat e Agenda Urbana a anonciat aué que trè a licitacion eth projècte de melhora deth tram dera N230 comprenut entre era boca Nòrd e Vielha. Aguest projècte s’emmèrque ena “Agenda N230” qu’eth secretari generau d’infraestructures der Estat, Xavier Flores, presentèc ena sedença deth Conselh Generau d’Aran eth passat mes de seteme.
Pendent era trobada de seteme eth secretari generau auancèc es actuacions previstes ena “Agenda N-230” e mostrèc eth compromís deth Ministèri de Transpòrts, Mobilitat e Agenda Urbana damb es territòris implicadi en aguest ahèr, en tot assegurar que i a ua volontat d’arténher melhores importants ena via e amiar a tèrme un seguiment collectiu entà assegurar era continuitat deth projècte.
Imatge d’archiu dera amassada damb eth Secretari Generau d’Infraestructures der Estat eth passat mes de seteme
Era sindica d’Aran, Maria Vergés, manifestaue era sua satisfaccion per aguesta noticia que “evidéncie eth compromís der Estat damb aguesta carretèra e damb era reclamacion istorica deth territòri que reclame ua via segura e adaptada as besonhs de sostenibilitat actuaus e futurs”.
En aguest sens era sindica d’Aran tanben remercaue qu’eth Conselh Generau d’Aran trabalhe damb era Generalitat de Catalunya “ena melhora dera C-28 e en impuls dera Agenda de Mobilitat Sostenibla amassa damb eth departament de Territòri” en tot demorar que “aguest projècte non dequèigue deuant des cambis amiadi a tèrme en govèrn dera Generalitat perque resulte de vitau importància entà Aran, mès encara, dempús de conéisher es auanci presentadi respècte ara N230 e eth besonh qu’es trabalhs damb era C-28 siguen coordinadi en sòn pas per Vielha”.
Cau rebrembar qu’eth passat mes de març, era sindica d’Aran, amassa damb es presidents des deputacions de Huesca e Lleida e es presidents des comarques dera Ribargoça catalana e aragonesa, mantengueren ua trobada de trabalh damb eth Secretari Generau d’Infraestructures ena s’acordèc per part deth Ministèri de Transpòrts, Mobilitat e Agenda Urbana, dessenhar un calendari conjunt d’actuacions e projèctes a amiar a tèrme entara melhora immediata dera carretèra N-230.
Vielha, 24 d’octobre de 2022