- Eth Conselh Generau d’Aran, a trauès deth hilat de Musèus dera Val d’Aran, a organizat un ampli ventalh d’activitats entre es dies 14 e 22 de mai entà commemorar eth Dia Internacionau des Musèus en Aran
En 1977, er International Council of Museums (ICOM) proposèc qu’es musèus de tot eth mon organizèssen activitats culturaus ath torn deth 18 de mai (qu’ei eth Dia Internacionau des Musèus) e eth 14 de mai (era Net des Musèus). Enguan, era tematica prepausada per ICOM ei “Eth poder des musèus” e es activitats organizades s’an creat d’acòrd damb es tres èishi principaus: eth poder d’arténher era sostenibilitat, eth poder dera accessibilitat e eth poder de bastir comunitat.
Eth hilat de Musèus dera Val d’Aran a organizat un programa d’acòrd damb aguestes directives, e tanben ath torn der “An des Mites”, de manèra qu’es accions auràn coma hiu conductor era mitologia e es legendes, autant a nivèu locau coma universau.
En aguesta linha, eth Musèu a organizat accions entath public generau, especiaument destinades ara comunitat locau, mès tanben s’a auut en compde es associacions locaus, coma era Associacion de Discapacitats d’Aran (ADDA) e es Hemnes de Les, entàs quaus s’an elaborat accions personalizades.
Programa especiau en motiu dera commemoracion deth Dia Internacionau des Musèus:
Dissabte, 14 de mai
22 ores Eth Poder Dera Musica: “Quan arriben es muses”
Concèrt d’arpa damb Berta Puigdemassa
Recepcion deth Musèu dera Val d’Aran, Vielha
Public generau. Sense resèrva.
Dimèrcles, 18 de mai
19 ores Eth Poder Dera Opèra: “Er Orfèu de Claudio Monteverdi: mès enlà deth mite”
Conferéncia musicada damb eth musicològ Oriol Pérez i Treviño
Recepcion deth Musèu dera Val d’Aran, Vielha
Public generau. Sense resèrva.
Dijaus, 19 de mai
18 ores Eth Poder Dera Memòria: “Mites, legendes e rebrembes des carrèrs de Les”
Itinerari a pè peth pòble de Les, dera plaça deth Haro enquiara capèla de Sant Blas
Activitat adreçada ara Associacion Hemnes de Les.
Diuendres, 20 de mai
10.30 ores Personatges Damb Superpoders: “Torna-te un èster poderós”
Talhèr de caracterizacion de personatges eroïcs damb materiau reciclat
Musèu dera Val d’Aran, Vielha
Activitat adreçada ara Associacion de Discapacitats d’Aran (ADDA).
Dissabte, 21 de mai
21h Eth Poder Des Esteles: “Istòries der univèrs”
Observacion deth cèu damb telescòpi, explicacion en clau mitologica, damb Verd e Blu e Obaga.
Lòc d’amassada: parcatge dera entrada de Vilamòs
Public generau. Resèrva per auança per telefòn en Musèu dera Val d’Aran (973 64 18 15).
Ath delà, es dies 14 e 22 de mai, es Musèus d’Aran se poiràn visitar gratuïtament:
Musèu dera Val d’Aran, Vielha
De dimars a dissabte: de 10-13.30 ores e de 17-20 ores
Dimenge: de 10-13.30 ores
Deluns: barrat
Ecomusèu çò de Joanchiquet, Vilamòs
De dimars a dissabte: de 11-14 ores e de 16-19 ores
Dimenge: de 11-14 ores
Deluns: barrat
Musèu dera Nhèu, Unha
De dimars a dimèrcles: de 10-13 ores
De dijaus a dissabte: de 17-20 ores
Barrat: dies 14, 15, 16 e 22 de mai