Eth Naut Pirenèu e Aran demanen informacion actualizada sus er estat dera candidatura entàs Jòcs Olimpics de 2030

  • Aguest maitin a auut lòc, ena sedença deth Conselh Generau d’Aran, era amassada periodica des presidéncies des conselhs comarcaus des territòris pirenencs e dera sindica d’Aran, ena que s’a coincidit ena importància qu’an aguesti Jòcs Olimpics entath Naut Pirenèu e Aran e demanen auer informacion puntuau der estat dera candidatura

Es presidéncies des conselhs comarcaus deth Pirenèu e era sindica d’Aran s’an amassat aguest maitin ena sedença deth Conselh Generau d’Aran entà seguir era evolucion des tèmes qu’enes darrèri mesi an metut dessús dera taula entà reivindicar mès atencion, mès recorsi e ua votz pròpria entath Pireneu. Hè ues setmanes s’envièc ath president Aragonès ua carta sollicitant ua amassada presenciau damb eth govèrn entà tractar eth desplegament territoriau der Executiu en Naut Pirenèu e Aran, demanar mès fortalesa e finançament entàs conselhs comarcaus e conéisher er estat des Leis de Montanha e Territòri. Ei previsible qu’aguesta amassada pogue amiar-se a tèrme en seteme e, entà premanir-la, es assistents ara amassada d’aué an acordat que demanaran amassar-se damb eth director de Politiques de Montanha e Litorau, Albert Alins, e eth delegat deth govèrn en Naut Pirenèu e Aran, Ricard Pérez.

Un des punts que s’a tractat ena amassada d’aué a estat era candidatura des Pirenèus entà organizar es Jòcs Olimpics d’iuèrn en 2030, dempús qu’ena amassada que mantengueren era passada setmana eth president dera Generalitat, Pere Aragonès, e eth president deth govèrn espanhòu, Pedro Sánchez, aguest darrèr confirmèsse eth sòn supòrt ath projècte. Presidéncies e sindicatura an coincidit ena importància d’aguest hèt e demanen qu’eth territòri torne a auer en brèu informacion puntuau der estat dera candidatura e demoren era participacion des comarques e des municipis en tot eth desvolopament deth projècte.

D’auti ahèrs que s’an tractat an estat es problèmes de finançament des conselhs comarcaus pera demora deth Govèrn dera Generalitat e era Diputacion en ingressar es subvencions qu’an de gestionar es conselhs, es pògui recorsi que se receben entà melhorar es accèssi as nuclèus e entà trèir era nhèu en iuèrn, e es problèmes de cobertura mobil en fòrça pòbles, ua critica dubèrta que s’a hèt as granes operadores que dan ath Pirenèu un servici deficient, o dirèctament le talhen, en èster nuclèus de pòga poblacion.

Un acòrd que s’a prenut aué ei era elaboracion d’un document en que se remassaràn es arguments e es línhes d’accion basiques que deth Naut Pirenèu e Aran ençà se considèren ineludibles d’afrontar enes pròplèu dètz ans entà garantir eth futur d’aguesti territòris.

Comments are closed.