Eth passat dissabte dia 17 de mai, eth Parc Olimpic deth Segre (La Seu d’Urgell), acuelhec er acte de Liurament de prèmis as Campions absoluts des diferentes disciplines d’Espòrts d’Iuèrn. 

Era jornada amassèc lèu de dues cents persones entre autoritats, esportistes e convidadi.

Pendent er acte, s’autrejèren es medalhes UFEC as Campions de Catalunya absoluts e es trofèus as clubs guanhadors des Ligues e Circuits des diferentes modalitats d’Espòrts d’Iuèrn.

Eth patinador aranés, Tòn Cónsul, arrecebec era medalha coma Campion de Catalunya Absolut. Aguesta reconeishença autrejada pera Union de Federacions Esportiues de Catalunya (UFEC) ei dessenhat per artista Benet Costa.

D’auta banda, era esportista catalana de patinatge artistic sus gèu, Marta Andrade, arrecebec eth prèmi ath merit esportiu. Marta finalizèc era sua participacion enes competicions er an 2002 e actuauments trabalhe coma professora titulara de patinatge ena seccion de Patinatge Artistic sus gèu deth FC Barcelona, en tot collaborar ena formacion e entrenament esportiu de Tòn Cónsul. Marta participèc en dus Jòcs Olimpics. Obtenguec era 20au posicion en es Jòcs Olimpics d’iuèrn de 1994 a Lillehammer e era 22au en es Jòcs Olimpics d’iuèrn de 1998 a Nagano. Ath delà, participèc en es 11 Campionats deth Mon, 7 d’Euròpa, 2 Universiades e a estat 12 còps Campiona d’Espanha e 13 de Catalunya.

Tòn, signèc enguan un convèni damb eth Conselh Generau d’Aran e Foment Torisme Val d’Aran entà promòir era destinacion toristica esportiua Val d’Aran peth mon, representada ena imatge e en es valors deth joen patinador, e der equip deth que forme part, mejançant eth patrocini institucionau.