• Aué s’a celebrat en Conselh Generau d’Aran era presentacion der “Estudi e estratègia toristica de ciclisme ena Val d’Aran”, ua accion prebotjada a trauès deth Plan de Sostenibilitat Toristica qu’a coma objectiu diversificar era aufèrta toristica deth nòste territòri, potenciar er usatge dera bicicleta coma alternativa ath transpòrt tradicionau e contaminant e era reclassificacion dera ofèrta ciclista, incorporant totes es modalitats

Aguest maitin a auut lòc era presentacion der “Estudi e estratègia toristica de ciclisme ena Val d’Aran”, ua accion impulsada laguens des linhes estrategiques deth Plan de Sostenibilitat Toristica dera Val d’Aran, qu’a coma principau objectiu arténher eth posicionament deth nòste territòri coma ua destinacion de referéncia en sector dera bicicleta.

“Era Val d’Aran ei un territòri dejà fòrça auançat en matèria de ciclisme, mès volem potenciar encara mès aguesta activitat que guanhe, cada còp, mès adeptes e ena qu’eth nòste territòri se pòt plaçar coma destinacion de referéncia internacionau”, asseguraue pendent era presentacion eth conselhèr d’Economia, Torisme e Promocion Economica, Josep Canut, en tot híger que “deth Conselh Generau d’Aran ençà plantejam accions de promocion tostemp ena linha dera sostenibilitat e eth suenh ath nòste territòri”.

Laguens deth Plan de Sostenibilitat, es accions plantejades en sector deth ciclisme son era potenciacion der usatge dera bicicleta coma alternativa ath transpòrt tradicionau e contaminant e era reclassificacion dera ofèrta ciclista, incorporant totes es modalitats: MTB, gravel, enduro, cicloturisme e ebike.

En acte d’aguest maitin s’a parlat tanben sus es naues oportunitats que representen autant eth projècte transtermièr Transgarona coma era incorporacion de Baqueira ath segment ciclista, dus naui productes qu’augmentaràn encara mès er atractiu dera Val d’Aran en aguest sens.

Er objectiu ei qu’era Val d’Aran arribe a auferir 8 sectors entà BTT, çò que se tradusís en 51 rotes senhalizades (28 de MTB-gravel e 23 de trail-enduro) e 1.050 km de rotes ciclistes en aguesta modalitat. Mentre qu’ena modalitat de carretèra, era Val d’Aran compde damb 7 pòrts senhalizadi e enguan se’n senhalizarà tanben eth Pòrt de Portet, ampliant atau era nòsta ofèrta. Eth Conselh Generau d’Aran trabalhe tanben entà establir diferents punts de servici entà biccletes en diuèrsi municipis deth territòri.

Ath delà, conscients dera importáncia qu’a era convivéncia entre diferents activitats, se contunharà amiant a tèrme eth projècte de sensibilizacion de respècte as senderistes ena practica dera bicicleta. En aguest sens, se distribuís era informacion corresponenta as empreses de loguer de biciletes entà qu’ac hèsquen extensiu as sòns clients e arténher atau uns espacis compartidi e respectuosi entà toti es usatgèrs e usatgères dera montanha.