Arties e Vielha celèbren er inici deth Nadau damb er alugat dera lutz e diuèrses activitats complementàries

Eth Nadau ei de mès en mès apròp, e donques, entà dar eth trèt de gessuda enes pròplèus hèstes nadalenques, Arties e Vielha celèbren er inici d’aguest periòde festiu damb eth tradicionau alugat der enllumenat public.

Eth 6 de deseme, Arties procedirà ar alugat dera lutz damb decoracions nadalenques ara 17h30 ena Plaça Ortau. Atau se procedirà ara illuminacion der arbe de Nadau patrocinat per Veuve Clicquot e s’aufrirà un brindis damb cava as assistents. Atau madeish, deth 6 ath 8 de deseme, debanarà eth mercadillo de dusau man de materiau esportiu d’iuèrn (bòtes, esquís, morralets, eca.) en ajuntament deth pòble.

Vielha tanben realizarà eth tradicionau alugat dera decoracion nadalenca en un acte qu’aurà lòc entàs 20h00 ena Plaça d’Era Querimònia, damb era illuminacion deth corneto que s’installèc peth prumèr còp pendent es passades vacances nadalenques.

Atau madeish, aguest acte servirà pr’amor qu’es establiments toristics dera Val d’Aran se junhen, en tot alugar era illuminacion nadalenca des sòns locaus, en tot profitar era preséncia de toristes pendent eth pònt hestiu de deseme.

“Er alugat dera illuminacion nadalenca mèrque er inici dera sason iuernau ena Val d’Aran, e per açò, animam a toti es establiments toristics ath hèt que participen d’aguest acte simbolic, qu’a d’afavorir era preséncia de milèrs de visitants pendent es pròplèus mesi en territòri”, comente era conselhèra de Torisme, Comèrç e Consum, Anna Diaz.