Aymar obten ua des 7 wildcards de sason qu’era organizacion acabe de publicar en tot barrar atau era lista de riders entath circuit der an que ven.

Per dusau an consecutiu er aranés, Aymar Navarro, formarà part deth Freeride World Tour, circuit de maximala categoria internacionau d’esquí e snowboard dehòra de pistes. Aymar ei un referent nacionau deth freeride, qui coma est an passat, acabe de recéber ua invitacion entà formar part deth circuit deth 2019 ath costat des melhors riders deth mon.

Aymar (29 ans) afronte atau era sua dusau sason ena elèit mondiau deth freeride gràcies a ua meritada wildcard frut deth sòn compromís ena competicion e en esquí. Era passada sason ua lesion enes ligaments deth sòn jolh quèr sofridi dies abans dera parada d’Andòrra non empedic que participesse en Vallnord Ordino-Arcalís, maugrat es molèsties e dolors que patie.

Dies mès tard, e encara sense auer recuperat era totau mobilitat en sòn jolh, er aranés tornèc a ratificar eth sòn compromís damb eth Freeride World Tour en participar ena quatau parada deth circuit en Fieberbrunn (Àustria). Era sòrt non acompanhèc a Aymar aguest còp e dempús d’enganchar-se damb ua ròca ena part nauta dera cara dera competicion auec sufisent en arribar san enquiar arc d’arribada.

Atau donques, es resultats obtengudi enes quate prumères pròves non permeteren a Aymar passar eth talh tara grana finau de Verbier (Soïssa), e recalificar automaticaments entath tour deth 2019, mès era confidança demostrada per esquiador espanhòu li a valgut tà qu’eth Freeride World Tour torne a confidar en eth, ua wildcard de sason que segur profitarà ath maxim.

E coma ja demostrèc en 2017, Aymar a esquí enes sues cames entà participar damb es melhors. Siguec alavetz quan participèc coma wildcard locau ena pròve d’Andòrra e artenhec un istoric tresau lòc damb ua impressionanta linha que demorèc tath rebrembe coma ua des melhors dera sason.

Ath delà dera invitacion d’Aymar, era organizacion a hèt publiques autes 6 mès qu’an acabat tath snowboarder Waikama Hama, es esquiadors Carl Regnér, Drew Tabke e Fabio Studer, es freeskiers Jackie Paaso e Maude Besse.

Aguesti sèt nòms se junhen as dues wildcards anonciades a finaus de mai de Tanner Hall e Hedvig Wessel e ath madeish viatge as riders classificadi dera sason passada en tot formar, en sòn conjunt, un roster de riders que promet un gran espectacle de freeride entara sason 2019.

Vielha, 19 de junhsèga de 2018

Conselh Generau d’Aran: Núria Sanjuan

Hònt: Diario As/ Fotos: Aymar Navarro