Eth SIAH organize un cors d’autocontròl emocionau, motivacion e autodefensa

Vielha, 23 d’octobre de 2018.- Eth SIAH (Servici d’Informacion e Atencion as Hemnes), organize toti es deluns deth mes de noveme un cors de coaching sus autocontrol emocionau, motivacion e autodefensa.

Eth SIAH ei un servici actiu e professionau, que des der an 2008 da supòrt e aufrís assessorament as hemnes e es sues familhes, ei un referent entàs hemnes que viuen e trabalhen ena Val d’Aran.

Es objectius generaus son:

  • Aufrir informacion, assessorament, prumèra atencion e acompanhament s’ei de bessonh, en relacion damb er exercici des drets des hemnes en toti es airaus: laborau, sociau, personau, familhau e d’auti.
  • Dar informacion, atencion e assessorament en un espaci public diferenciat e d’accès dirècte.
  • Vincular eth SIAH as circuits d’atencion locau enes casi de situacion de violéncia de genre e hèr deth SIAH era pòrta d’entrada e/o de referéncia des hemnes que se trapen en aguesta situacion.

Es objectius especifics son:

  • Difóner informacion as hemnes sus es sòns drets e er exercici d’aguesti.
  • Proporcionar as hemnes orientacion e assessorament sus tèmes que poguen èster deth sòn interès.
  • Facilitar atencion e assessorament juridic e psicologic especializat as hemnes qu’ac demanen o a aqueres qu’es professionaus ac consideren de bessonh.
  • Trabalhar damb era comunautat e eth hilat associatiu femenin.
  • Dinamizar e impulsar era coordinacion e era collaboracion damb es grops e es organizacions des hemnes e aufrir recorsi que les faciliten portar a tèrme es sues activitats.
  • Assessorar as hemnes en situacions de violéncia de genre, orientar-les e coordinar ua prumèra atencion damb es Servicis Sociaus e d’auti recorsi publics o privats.
  • Actuar coma observatòri dera realitat des hemnes deth territòri e proporcionar es informacions de besonh entà collaborar ena definicion des linhes prioritàries d’intervencion enes politiques de hemnes.
  • Hèr activitats de sensibilizacion sociau.

Es objectius deth cors son entre d’auti: conéisher e practicar estrategies entà gerir es emocions, potenciar er autocontròl e practicar tecniques de defensa personau de Hapkido, que permeten evitar es agressions e redusir ar auta part, sense atacar ne agredir.

Eth cors organizat peth Conselh Generau d’Aran e eth SIAH (Servici d’Informacion e Atencion as Hemnes), en collaboracion damb er institut Catalan des Hemnes, debanarà es deluns 5, 12, 19 e 26 de noveme de 16:00 a 20:00 ores en CDIAP, C/ Pomaròla, 12 baishi de Vielha.

Entà mès informacion e inscripcions, vos podetz adreçar a Servicis Sociaus deth Conselh Generau d’Aran, C/ Major, 36, en tot trucar ath +34 973 642 560 o per corrèu electronic a siah@aransalut.com

Aguesta activitat s’includís laguens des organizades damb motiu deth Dia Mondiau Contra era Violéncia de Genre.

 

Comments are closed.