Barcelona, 10 de març de 2016.- Eth Sindic d’Aran Carlos Barrera e eth secretari generau der Espòrt dera Generalitat Gerard Figueras, an mantengut aué ua amassada de trabalh ena que Barrera, li a transmetut era volontat deth Conselh Generau d’Aran d’amiar era creacion dera Federacion Aranesa d’Espòrts d’Iuèrn.

Eth desplegament dera naua Lei d’Aran, aprovada peth Parlament de Catalonha eth 21 de gèr de 2015, en sòn article 57.6, autrege era possibilitat de desvolopar aguesta competéncia ath Conselh Generau d’Aran.

Article 57.

Espòrts e léser

1.Corresponen ath Conselh Generau d’Aran es competéncies següentes en matèria d’espòrt:

a) Eth foment, era divulgacion, era planificacion, era coordinacion, era execucion, er assessorament, era implantacion e era projeccion dera practica dera activitat fisica e der espòrt en Aran.

b) Eth foment e era promocion der associacionisme esportiu.

c) Era planificacion e era promocion deth hilat d’equipaments esportius.

d) Era participacion ena prevencion dera violéncia enes espectacles publics esportius.

e) Eth registre d’entitats que promòn e organizen era practica dera activitat esportiva damb sedença en Aran.

6. Eth Conselh Generau d’Aran a competéncia entà establir eth regim juridic des federacions e clubs esportius e des entitats araneses que promòn e organizen era practica der espòrt e era activitat fisica en encastre d’Aran, e tanben entara declaracion d’usatge public des entitats esportives.

Eth sindic d’Aran Carlos Barrera, expliquèc qu’era creacion dera Federacion Aranesa d’Espòrts d’Iuèrn, aurà de comportar era modificacion dera Lei catalana der espòrt, entà dar cabuda ad aguesta peticion.

Era amassada d’aué, Gerard Figueras a manifestat ath sindic d’Aran, era implicacion e eth supòrt dera secretaria der Espòrt dera Generalitat ath Conselh Generau d’Aran, ena organizacion dera finau dera Copa deth Mon de Snowboard Cross que se celebrarà en Baqueira Beret es dies 19 e 20 de març, atau coma ena organizacion dera nauau etapa deth Tour de França 2016 deth dia 10 de junhsèga, que gesserà de Vielha e Mijaran e acabarà en Andòrra.