Eth sindic d’Aran e era consellera de Governacion formalizen er acòrd de finançament deth Conselh Generau d’Aran entath 2016 de mès de 22MEUR

Er acòrd s’a signat pendent era reünion dera Comission Bilaterau Govern- Conselh Generau d’Aran, presidida pera consellera de Governacion, Meritxell Borràs, e peth sindic d’Aran, Carlos Barrera.

• Era titulara de Governacion a sollicitat as bailes d’Aran implicar-se a hons en procès de debat GovernsLocals.cat entà hèr valer era singularitat deth territòri.

 

????????????????????????????????????

Era consellera de Governacion, Administracions Publiques e Abitatge, Meritxell Borràs, e eth sindic d’Aran, Carlos Barrera, an signat aué er acòrd de finançament entath 2016 deth Conselh Generau d’Aran, que some un impòrt totau de 22.066.727 èuros. Eth Departament de Governacion assumís aguesta transferéncia, damb un impòrt de 21.819.267 èuros. Aguesta chifra includís eth hons qu’eth Departament de Presidéncia apòrte ath pressupòst de Governacion entà promòir er usatge sociau der aranés (60.000 èuros) e es qu’eth Conselh Catalan der Espòrt transferís entath foment der espòrt e eth Centre de Tecnificacion d’Espòrts d’Iuèrn (142.500 èuros). Era rèsta der impòrt (247.459 èuros) ei era soma des recorsi qu’apòrten es departaments de Cultura; Territòri e Sostenibilitat; e Empresa e Coneishement.

Es transferéncies dera Generalitat, era major part dejà s’an hèt efectives, se destinen ath finançament dera institucion d’autogovèrn aranés e ar exercici des sues competéncies, d’acòrd damb era Lei 1/2015, deth 5 de hereuèr, deth regim especiau d’Aran.

En 2015, eth Conselh Generau d’Aran arrecebec dera Generalitat 21.475.169 èuros, enguan eth finançament s’a incrementat es 591.558 èuros. Er aument ei destinat, majoritàriaments, as partides qu’acompanhen es competéncies transferides enguan en govèrn autonòm ena matèria d’ensenhament, sanitat e conservacion, gestion e difusion deth patrimòni documentau, entre d’auti.

 

DSC_0546

 

Era consellera Borràs a destacat era bona entesa entre eth Govèrn e eth Conselh Generau d’Aran entà acordar eth finançament: “encara non auem arribat a finau d’an e dejà i a un acòrd en tèmes economics”. Tanben a explicat que s’a metut en marcha ua comission “que trabalhe entà establir un nau modèl de finançament estable, tau coma mèrque era lei d’Aran deth 2015”.

Eth sindic d’Aran, Carlos Barrera, tanben s’a mostrat satisfèt e a soslinhat era bona disposicion deth Govèrn entà atier es besonhs deth territòri: “avaloram positivaments er acòrd de finançament. En tot tier en compde qu’es pressupòsti dera Generalitat son prorogadi, er increment ei important e demòstre sensibilitat e capacitat de negociacion”.

 

DSC_0538

 

Er acòrd de finançament entath 2016 s’a signat aguest maitin, pendent era reünion deth plen dera Comission Bilaterau Govèrn dera Generalitat – Conselh Generau d’Aran, que s’a celebrat aué ena Casa deth Senhor d’Arròs e qu’an presidit era consellera e eth sindic d’Aran.

Era Comission Bilaterau ei er organ permanent de relacion entre es govèrns e es administracions dera Generalitat e eth Conselh Generau d’Aran entath desvolopament deth regim especiau d’Aran. Aguesta ei era tresau reünion qu’a celebrat era comission dempús dera sua constitucion, en hereuèr deth 2015, en compliment dera Lei 1/2015.

 

DSC_0571

 

Ath delà dera consellera Meritxell Borràs e deth sindic d’Aran Carlos Barrera, tanben an participat ena reünion dera Comission Bilaterau era delegada deth Govèrn en Naut Pirenèu e Aran, Maria Rosa Amorós; eth secretari d’Administracions Locaus, Joaquim Ferrer, e era directora territoriau de Governacion en Lleida, Anna Feliu. En representacion deth Conselh Generau d’Aran: eth vicesindic d’Aran, Luis Carlos Medina, e es conselhèrs que ne hèn part.

 

DSC_0582

 

Presentacion de GovernsLocals.cat

Dempús dera reünion dera Comission Bilaterau, era consellera Borràs s’a desplaçat ara sedença administrativa deth Conselh Generau d’Aran en Vielha entà presentar, pendent era reünion deth Conselh de bailes dera Val d’Aran, eth procès GovernsLocals.cat.

Era titulara de Governacion a arrebrembat qu’eth Conselh Institucionau d’aguest procès de debat tanben ne hè part eth Sindic d’Aran, Carlos Barrera, entà per’mor que demore representada era singularitat d’Aran ena composicion des futures leis que regiràn es administracions locaus catalanes. En aguesta linha, era consellera Borràs a parlat dera “diuersitat” deth país e a constatat era importància qu’es bailes e bailesses dera Val d’Aran participen en procès, per’mor qu’an besonhs fòrça diferenti as que pòden auer d’auti territòris: “non ei çò de madeish er airau metropolitan, per exemple, qu’Aran”.

Borràs a arrebrembat qu’enquiara es leis qu’afècten ath mon locau s’auien hèt des deth Govèrn o des deth Parlament e qu’ara, per prumèr còp, se harà ena reforma en base as sues demandes. Per açò, a sollicitat as representants locaus a implicar-se a hons en debat: “volem que i participen pr’amor que se tracte de decidir coma an d’èster es leis deth futur qu’afècten tèmes que les tòquen de plen, coma era organizacion territoriau e eth finançament”.

Eth procès GovernsLocals.cat s’a organizat en sies encastres de trabalh: organizacion territoriau e servicis as persones; organizacion des govèrns locaus; relacions intergovernamentaus; naua governança, en tot innovar era gestion publica locau; e finances locaus.

 

DSC_0586

 

Bailes, presidents d’Entitats Municipaus Descentralizades e presidents de conselhs comarcaus poderàn participar presenciauments enes sessions de debat en territòri. En aguestes sessions se debaterà sus cadun d’aguesti encastres e es resultats s’enviaràn ara rèsta de cargues electes entà pr’amor que, via telematica, poguen hèr-i es aportacions corresponentes. Tanben s’establiràn diuèrsi procèssi participatius a nivèu municipau e s’arrecuelheràn opinions a trauès deth web governslocals.cat, a on i aurà estruments de debat des sies encastres de trabalh, ath delà d’un huelheton electronic que fomentarà era participacion des electes.

Es documents se coordinaràn en un comitat tecnic format per representants de totes es administracions e se someteràn ara consideracion d’un grop d’assessors, que poderàn assistir es equipes des encastres de trabalh e aportar contenguts e coneishements, coma expèrts ena matèria.

Eth procès de debat finalizarà entre es mesi de gèr e hereuèr deth 2017, damb ua session a on s’aportaràn es resultats des sessions territoriaus e des aportacions telematiques des cargues electes. D’aguesta session finau ne gesserà un document que se trasladarà ath Parlament de Catalonha e qu’a de servir coma basa entà elaborar es futures leis des govèrns locaus.

Eth procès se presentèc eth passat mes de junhsèga, damb era prumèra reünion deth Conselh Institucionau, que se hec en Parlament de Catalonha, dirigida peth president dera Generalitat, Carles Puigdemont; acompanhat deth vicepresident, Oriol Junqueras, e dera consellera de Governacion, Administracions Publiques e Abitatge, Meritxell Borràs. Tanben i participèren es presidents des quate deputacions catalanes e es representants des entitats municipalistes, der Ajuntament de Barcelona, deth Conselh Generau d’Aran e des sies grops parlamentaris.

 

 

 

Vielha, 4 de noveme de 2016

 

Conselh Generau d’Aran: Núria Sanjuan

Hònt: Governació

Comments are closed.