Eth sindic d’Aran e era consellera de Governacion signen er acòrd de finançament der exercici 2015 de 21,5 milions d’èuros

Er impòrt totau deth finançament d’enguan deth Conselh ei de lèu 21,5 milions d’èuros, era major part ja an estat transferidi, d’acòrd damb es previsions dera Lei 1/2015 deth regim especiau d’Aran.

• Meritxell Borràs, consellera de Governacion dera Generalitat de Catalunya a celebrat qu’era lei d’Aran se mantengue intègra, en tot includir eth dret a decidir e er usatge preferent der aranés, que non seràn recorrudi peth Tribunau Constitucionau.

 

governacion

Eth sindic d’Aran, Carlos Barrera, e era consellera de Governacion e Relacions Institucionaus dera Generalitat de Catalunya, Meritxell Borràs, an signat aguest maitin ena Val d’Aran er acòrd qu’arrecuelh eth finançament corresponent ar exercici 2015 deth Conselh Generau d’Aran. Es transferéncies dera Generalitat, per un impòrt totau de 21.475.169 èuros, son destinades ath finançament dera institucion d’autogovèrn aranés e ar exercici des sues pròpies competéncies, en compliment dera Lei 1/2015, deth 5 de hereuèr, deth regim especiau d’Aran.

“Se tracte d’un acòrd beneficiós entà toti”, a declarat era consellera Borràs, “qu’arrespon as besonhs d’Aran e da compliment non sonque ara lei d’Aran, se non tanben a diuèrsi convènis que s’an anat signat entre eth Govern dera Generalitat e eth Conselh Generau”. Segons era titulara de Governacion, “ei just que s’i a naues competéncies qu’a assumit Aran, aguestes competéncies vagen acompanhades dera partida economica corresponenta”.

D’auta banda, era consellera a destacat eth trabalh conjunt entre eth Govern dera Generalitat e eth Conselh Generau d’Aran entà deféner aquerò qu’ei pròpri dera Val d’Aran e a celebrat que fin finau era lei d’Aran se mantengue intègra. “Eth Gobierno espanhòu plantejèc dobtes sus era constitucionalitat de bèri articles dera lei d’Aran que podien acabar en tot portar era lei ath Tribunau Constitucionau, mès gràcies ar esfòrç e eth trabalh conjunt aguesta lei non s’a modificat”, a explicat.

En aguest sens, eth sindic d’Aran, Carlos Barrera, tanben a avalorat positivaments era collaboracion damb era Generalitat, qu’a permetut mantier integralaments eth tèxte dera lei, era quau causa a qualificat com “un èxit sense precedents de toti”. Per çò que tanh ar acòrd de finançament, Barrera a assegurat que da responsa a toti es traspassi e mèrque era basa des negociacions entath fiançament deth 2016. Atau madeish, a destacat era importància der acòrd, en tot tier en compde er ofegament pressupostari dera Generalitat per part deth Gobierno espanhòu.

consellera-querimònia

 

Finançament entà competéncies e traspassi

Eth volum deth finançament correspon a ua partida deth Departament de Governacion e Relacions Institucionaus destinades ara dotacion des pròpies competéncies dera Val d’Aran per valor de 20.941.927 èuros que li cau somar es transferéncies qu’apòrten ath pressupòst de Governacion des deth Departament de Cultura en concèpte de normalizacion lingüistica (145.000 èuros); deth Departament de Presidéncia ena matèria de foment der usatge sociau der aranés (60.000 èuros) e deth Conselh Catalan der Espòrt entath foment der Espòrt e deth Centre de Tecnificacion (120.000 èuros). Atau, er impòrt totau damb cargue ara partida deth pressupòst 2015 de Governacion ei de 21.266.927 èuros.

Era rèsta der impòrt (208.242 èuros) correspon a diuèrses partides de menor quantia que transferissen dirèctaments es departaments d’Agricultura, Ramaderia, Pesca, Alimentacion; Benéster e Familha; Empresa e Aucupacion, e Interior.

D’acòrd damb es previsions dera Lei 1/2015 deth regim especiau d’Aran, pendent er an 2015 eth Departament de Governacion a transferit ath Conselh Generau d’Aran un totau de 20.399.741 èuros en forma de finançament per trimèstre auançat.

Era Ponéncia permanenta de trabalh ena matèria de traspassi e convènis creadi ena Comission Bilaterau Govern dera Generalitat – Conselh Generau d’Aran ei eth responsable deth seguiment e avaloracion d’aguest acòrd.

Comments are closed.