Eth sindic d’Aran recep ath conselhèr de Politiques Digitaus e Administracion Publica dera Generalitat

  • Ena amassada mantenguda aguest maitin ena sedença deth Conselh Generau, s’a abordat eth projècte de desplegament dera fibra optica ena Val d’Aran e s’a acordat era signatura d’un conveni entre eth govèrn d’Aran e era Generalitat de Catalunya entà garantir era arribada d’aguesta infraestructura a toti es municipis aranesi en 2021

Eth sindic d’Aran, Francés Boya, a arrecebut aguest maitin ena sedença deth Conselh Generau d’Aran ath conselhèr de Politiques Digitaus e Administracion Publica, Jordi Puigneró, qu’a visitat era Val d’Aran entà presentar eth projècte de desplegament dera fibra optica dera Generalitat.

“Entà Aran era possibilitat de compdar damb ua fibra optica publica e de qualitat, que ja ei en Vielha e que pròplèument arribarà ena rèsta de municipis deth territòri, supause ua grana oportunitat que mos connècte ara economia digitau e que mos permeterà desvolopar ua diversificacion economica fòrça importanta entath país e crear naues oportunitats entara nòsta joenessa, çò que represente un saut qualitatiu important entara Val d’Aran”, a afirmat eth sindic d’Aran.

“Eth dera economia digitau ei un sector que genère aucupacion, ei un sector d’oportunitats e entà desvolopar-se ac pòt hèr en quinsevolh lòc deth mon, sonque a de besonh ua bona connectivitat e talent”, asseguraue eth conselhèr Puigneró, en tot híger que: “damb era arribada d’aguesta infraestructura ena Val d’Aran garantim era igualtat entàs ciutadans aranesi as que, gràcies ath convèni que signaram damb eth Conselh Generau d’Aran, asseguram era arribada dera fibra en toti es municipis en 2021”.

Era Generalitat a invertit ath torn de 3.500.000 d’euròs en aguest projècte de desplegament dera fibra optica. Ena prumèra fasa d’aguest projècte s’a connectat eth Pòrt dera Bonaigua damb Vielha, tram que se trape encara en òbres, e entà 2021 se preten qu’aguesta infraestructura arribe ara rèsta de municipis aranesi.

Pendent aguesta jornada, s’a amiat a tèrme ua amassada ena qu’an estat presents era vicesindica prumèra, Maria Vergés, era conselhèra de Naues Tecnologies e Innovacion, Angelina Cases, era deputada deth Parlament, Anna Geli, e eth secretari de Politiques Digitaus, David Ferrer, entre d’auti, e ena qu’an intervengut sectors primordiaus en Aran coma eth Grèmi d’Ostalaria, representants dera empresa Arantech e eth grop assessor deth HUB d’innovacion en montanha.

En aguesta amassada eth sindic a presentat ath conselhèr es actuacions amiades a tèrme peth govèrn deth Conselh Generau en matèria d’innovacion e retencion e atraccion deth talent, des quaus a destacat era creacion deth HUB d’innovacion, creat a compdar deth procès participatiu Aran Accion 20/30, e que se trape dejà en vies de desvolopament entà esdevier ua realitat enes pròplèu setmanes.

“Eth mon rurau a de besonh impulsar naues iniciatives entà reactivar es activitats economiques des sòns pòbles de montanha, que seguissen era tendéncia d’esdevier lòcs a on era poblacion envielhís e i demore cada còp mens gent joena” a assegurat Boya, en tot híger que: “era arribada dera fibra optica e era implementacion de projèctes coma eth HUB de montanha mos an d’ajudar a èster capables d’esdevier un territòri de referéncia enes encastres dera innovacion, era tecnologia e era retencion e atraccion deth talent”.

Comments are closed.