• Aguestes chifres remassen era pujada deth mercat internacionau, que lidère er aument e consolide era sua preséncia.

Era sason d’iuèrn, entre eth 1 de deseme e eth 6 d’abriu, s’a barrat damb un balanç fòrça positiu entath sector toristic, e a registrat un increment significatiu des pernoctacions respècte ar an anterior.

En concret, eth totau d’estades a artenhut es 826.018, comparades damb es 728.942 dera sason 2024-2025 (12/12/2024 – 21/04/2025), çò que represente un aument deth 13,32%.

Eth mercat nacionau encara ei eth principau motor en volum, damb 520.427 pernoctacions, leugèrament per dessús des 504.713 der an passat, damb ua evolucion positiva deth 3,11%.

Per contra, eth mercat internacionau ei eth gran protagonista dera sason, damb ua pujada fòrça importanta deth 36,29%, dempús de passar de 224.229 a 305.591 pernoctacions.

Entre es mercats internacionaus prioritaris, França ei eth prumèr dera lista damb 191.511 pernoctacions, seguida deth Reiaume Unit (23.000) e Portugal (20.166), toti eri damb increments significatius.

Tanben cau remercar eth fòrt creishement de mercats emergents, com es Estats Units, Àustria e China, que dupliquen es sòns registres respècte ara sason anteriora.

En çò que tanh ath mercat nacionau, Madrid e Barcelona se mantien com es principaus emissors, damb 111.813 e 104.796 pernoctacions, respectivament, seguides de Lleida, que tanben experimente ua evolucion positiva.

D’auti mercats, com València, Biscaia e Guipóscoa an registrat ua leugèra devarada que non an afectat eth balanç generau positiu.

Era estada mejana s’a plaçat en 2,85 nets, çò que consolide un modèl d’estades relativament cuertes mès intensives.

Eth nombre totau d’excursionistes a estat de 306.170 persones pendent aguesta sason.

En tèrmes economics, era despena mejana per pernoctacion s’estime en 200 €, çò que se tradusís en un impacte economic globau en territòri, ena sason d’iuèrn, de 161 milions d’euros.  Açò supause ua despena de mès d’1,27 milions d’euros ath dia ath long des 126 dies dera sason d’iuèrn.

En çò que tanh ara ocupacion otelèra, es dades mòstren ua evolucion irregulara mès globaument positiva en bona part des mesi. Gèr e hereuèr an registrat es nivèus mès nauti d’ocupacion, damb percentatges per dessús deth 69% e 78% respectivament. Març tanben a milhorat es sòns resultats, en tot passar deth 51,74% en 2025 ath 55,83% en 2026.

Per contra, eth mes de deseme a mostrat ua leugèra baishada dera ocupacion en comparason damb er an anterior.

Aguest conjunt de dades confirme era tendéncia deth creishement deth mercat internacionau.

Entà Josep Canut, conselhèr de Torisme e Promocion Economica deth Conselh Generau: “Era diversificacion des mercats emissors e eth creishement dera despena consoliden eth torisme com un des pilars economics deth territòri” en tot híger que “es resultats obtengudi refortissen er atractiu dera Val d’Aran coma destinacion toristica”.

Vielha, 29 d’abriu de 2026