Eth dimèrcles, 30 de noveme, es tecnics deth Centre de Lauegi deth Conselh Generau d’Aran organizèren ua Jornada informativa d’inici de sason ena Audiovisuau de Vielha a on assistiren ues setanta persones. Guides de nauta montanha, pisters/socorristes e amants dera montanha se dèren cita en aguest acte que se preve celebrar de manèra annau. Er acte compdèc damb era preséncia deth vicesindic d’Aran, Luis Carlos Medina.

Pendent es charrades aufrides pes madeishi tecnics deth Centre de Lauegi d’Aran, Jordi Gavaldà, Ivan Moner e Montse Bacardit, e tanben peth guida de nauta montanha, Roger Martorell, s’expliquèren es esturments de seguretat qu’aufrís eth Centre as usatgèrs dera montanha, es aportacions mès innovadores deth congrès de nhèu e lauegi de Colorado, a on assistiren es tecnics deth Centre de Lauegi d’Aran eth passat mes d’octobre e se presentèc eth hilat OBS+, un grop d’observadors volentaris format per guides, pisters,… qu’aportèren donades de nhèu e lauegi entà melhorar era seguretat e es coneishements de tota era comunautat.

En aguest darrèr punt se presentèc era collaboracion qu’enguan s’inície damb Mountain Hub (www.mountainhub.com). Aguesta plataforma online permeterà compartir donades fòrça considerables entara seguretat des montanhencs a temps reau e georeferenciada sus un mapa. D’aguesta manèra toti es usatgèrs pòden convertir-se en observadors e ath madeish temps arreceberàn era informacion dera rèsta dera comunautat.

Tanben s’informèc qu’eth Centre de Lauegi d’Aran començarà a eméter bulhetins de perilh de lauegi eth diuendres, dia 2 de deseme, e ac harà enquia finaus deth mes d’abriu.

Web deth Centre de Lauegi d’Aran: http://lauegi.conselharan.org/ 

Vielha, 2 de deseme de 2016

Conselh Generau d’Aran: Núria Sanjuan