- Aguest ostiu, un totau de 14 persones an emplegat er espaci coworking deth Hub d’Innovacion Rurau deth Conselh Generau d’Aran – HèPic totes eres damb perfils fòrça diferents e que se dedicauen a airaus coma era engenheria, era comunicacion, era informatica o era recerca scientifica, entre d’auti. I a auut auntant persones dejà residentes en Aran, coma persones recentament establides en nòste territòri o que visitauen era Val d’Aran e auien de besonh un espaci a on teletrabalhar
Pendent es sòns tres prumèri mesi de dubertura ath public, er espaci coworking deth Hub d’Innovacion HèPic a auut ua acuelhuda fòrça positiva, autant per part des usatgèrs e usatgères dera Val d’Aran, coma per part des persones qu’an visitat eth nòste territòri aguest ostiu e qu’auien de besonh un espaci a on teletrabalhar.
Der 1 de junh ençà, an emplegat aguest espaci un totau de 14 persones, 3 d’eres amiant a tèrme ua estada de longa durada, e 11 per periòdes de temps mès cuert.
En cas des persones qu’an hèt a servir eth coworking en periòdes de longa estada, dues d’eres son persones nauvengudes que, dempús d’establir-se recentament en Aran, auien de besonh un espaci a on desvolopar eth sòn trabalh.
Per çò que hè as usatgèrs e usatgères qu’an emplegat aguest espaci pendent mens de 15 dies, provien ena sua majoria de Madrid e Barcelona, mès tanben de Òsca, deth Pallars e de França.
“Èm plan satisfèts pera acuelhuda que comence a auer aguest espaci de naua creacion e contunharam apostant per accions coma aguesta, qu’ajuden ath nòste territòri a diversificar era sua economia, a progressar e a auançar enquia un futur emprenedor e innovador”, afirmaue era sindica d’Aran, Maria Vergés, que higie que: “eth coworking ei dubèrt a totes aqueres persones emprenedores, petites empreses, startups o professionaus independents qu’agen de besonh un lòc fisic a on trabalhar, compartir idèes e materializar eth sòn projècte damb eth supòrt dera administracion”. En aguest sens era sindica d’Aran manifestaue que “aguesta iniciativa permet tanben dar a conéisher era Val d’Aran coma un endret a on ei possible desvolopar porjèctes innovadors damb vision de futur”.
Es perfils de persones qu’an emplegat aguest servici pendent er ostiu a estat fòrça diuèrs: i a auut auntant professionaus dera engenheria, era comunicacion o era informatica, coma persones dedicades ara recerca scientifica, entre d’auti.
Aguest espaci coworking, damb capacitat entà atier a 8 persones ath madeish temps, compde damb ua sala compartida, dues sales d’amassades, sala de formacion e eveniments, e tanben un burèu entà auer amassades privades. Aguest entorn propici entath desvolopament de naui projèctes estimule era flexibilitat, eth dinamisme e era innovacion coma motors de creativitat e collaboracion.
Entà poder accedir ath coworkig, ei de besonh ramplir un formulari que se facilitarà a trauès der email infohepic@aran.org, eth telefòn 667 670 271 o ena plana web de HèPic. En cas que i age un nombre superior de sollicituds que de places liures, se priorizaràn es projèctes mès innovadors.