Vielha, 7 de junh de 2019.- Es 9 escolans deth PFI d’Auxiliar en ventes, Burèu e Atencion ath public ena Val d’Aran an arrecebut era sua titolacion de mans dera conselhèra de Torisme e Desvolopament Economic en foncions, Anna Díaz.

Cau destacar que toti es escolans deth PFI an aprovat eth cors damb bones nòtes e quauqui uns d’eri jà an trabalh un còp acabat eth cors.

Eth Programa de formacion e insercion deth PTT Val de Aran, s’adrece a joeni entre 16 e 21 ans que non an eth títol deth graduat escolar mès qu’an desirs de formar-se en bèra profession, entrar en mon laborau o aumentar es possibilitats de contunhar era formación professionau damb un grad mejan.

Eth perfil deth PFI-Plan de Transicion ath Trabalh dera Val d’Aran ei d’Auxiliar en ventes, Burèu e atencion ath public, en qué s’aufrís formacion professionau en encastre deth comèrç, atencion ath client, empaquetat, magasèm, ofimatica e tecniques administratiues basiques, entre d’auti, pr’amor qu’es joens poguen aplicà’c e contunhar en tot apréner a trauès des practiques ena enterpresa.

Era durada ei era d’un cors escolar (1.000h).

Ath delà d’aguesta formacion especifica, es gojats e gojates an era oportunitat de meter-se ath dia damb contenguts basics coma es matematiques, es lengües e era coneishença der entorn, que les permeteràn obtier facilitats entà aprovar era pròva d’accès a Cicles Formatius de Grad Mejan, en cas de voler contunhar era formacion professionau.

En aguest sens cau arrebrembar qu’eth Conselh Generau d’Aran e era Generalitat de Catalonha a trauès deth departament d’Ensenyament, an renauit enguan eth convèni de collaboracion entara realizacion de programes de formacion e insercion organizadi peth Conselh Generau d’Aran laguens deth Programa deth Plan de Transicion ath Trabalh (PTT), adreçat a joens qu’an finalizat er ensenhament obligatòri (ESO) sense obtier eth títol de graduat/da.