Finalize er operatiu de recerca des dues persones desapareishudes eth 25 de seteme

octobre 1, 2020 Notícies, Pompièrs-Emergéncies

  • Es còssi sense vida des dues persones desapareishudes an estat localizadi ena zòna der Estanh de Pòdo dempús de quate jornades de recerca per via aeriana e terrèstra

  • An participat activament en aguest operatiu de recerca efectius deth GRM de Pompièrs-Emergéncies, eth GRAE de Bombers, era UIM de Mossos d’Esquadra, eth GREIM dera Guardia Civil, Agents Rurals dera Generalitat, Agents de Miei Ambient deth Conselh Generau d’Aran, unitats canines de Mossos e Bombers, er elicoptèr Eliance Val d’Aran e elicoptèrs dera Generalitat

Era recerca des dues persones vistes per darrèr còp eth passat 25 de noveme ena zòna deth Refugi de Colomèrs a finalizat aguest meddia en localizar es còssi sense vida des desapareishuts ena zòna der Estanh de Pòdo.

Pendent aguesti darrèri dies, Pompièrs-Emergéncies deth Conselh Generau e Bombers de la Generalitat an coordinat es trabalhs de recerca amassa damb efectius de Mossos d’Esquadra, Agents Rurals i Guardia Civil. Autant per tèrra coma per aire, des der inici des trabalhs s’a hèt ua recerca extensiva ena major part deth Parc Nacionau d’Aigüestortes.

Aué, des de prumèra ora deth maitin, eth dispositiu s’a centrat en aqueres zònes a on i auie mès acumulacion de nhèu e a on se preveiguie que poirien auer cercat refugi. Era estrategia d’aué ère mantier un dispositiu ampli mès centrat en entornejar aguesti punts auent en compde que se volie profitar eth temps favorable deuant eth canvi de meteorologia previst de cara a deman. An estat efectius terrèstres dera UIM de Mossos d’Esquadra e Bombers GRAE qui, ath torn des 12:00 ores, an localizat es dus còssi sense vida a pògui mètres der Estanh de Pòdo.

En aguestes darrères quate jornades de recerca an participat activament en aguest operatiu de recerca efectius deth GRM de Pompièrs-Emergéncies, eth GRAE de Bombers, era UIM de Mossos d’Esquadra, eth GREIM dera Guardia Civil, Agents Rurals dera Generalitat, Agents de Miei Ambient deth Conselh Generau d’Aran, unitats canines de Mossos e Bombers, er elicoptèr Eliance Val d’Aran e elicoptèrs dera Generalitat.

Comments are closed.