Finalize era formacion sus violéncia de genre e victimologia deth Conselh Generau d’Aran

  • Ath torn de 30 professionaus deth Conselh Generau d’Aran, ajuntaments deth territòri, Aran Salut e Pompièrs d’Aran, an participat en aguest cors, en quau an recebut formacion sus era construccion dera violéncia, era violéncia de genre en contèxt dera parelha, es efèctes enes victimes e era intervencion en aguesti casi

Eth Conselh Generau d’Aran, a trauès deth SIAH, a aufrit ua formacion ath personau des administracions publiques araneses sus intervencion en violéncia de genre e victimologia, ena qu’an participat ua treinta de professionaus de diuèrsi perfils deth Conselh Generau, ajuntaments, Aran Salut e Pompièrs d’Aran.

En aguest cors, qu’a auut ua durada de tres setmanes e a estat impartit pera doctora en psicologia clinica e forense, Elena Garrido Gaitán, s’an trabalhat elements dera violéncia de genre en contèxte dera parelha des d’un punt d’enguarda psicosociau e culturau. S’an tractat es fondaments e estructuracion d’aguest tipe de violéncia, atau coma es sequèles e era psicopatologia associada ath damatge patit pes victimes. Es participaires an trabalhat tanben diferents esturments aplicadi ara intervencion damb es victimes.

“Entath govèrn deth Conselh Generau d’Aran aguest ahèr ei de vitau importància e, per aquerò, trabalham entà amiar a tèrme ua sèria d’accions en matèria de formacion, prevencion e coordinacion damb toti es estaments tà hèr front ara lacra que supause era violéncia de genre e auançar entà ua societat mès justa e igualitaria”, afirmaue era sindica d’Aran, Maria Vergés.

Comments are closed.