Er an 2015, era destinacion de Catalonha que mès creishec toristicament siguec era Val d’Aran
A enregistrat un aument de 4,75% en viatgèrs e d’un 8,78% de pernoctacions respècte deth 2014.
Eth patronat de torisme dera Val d’Aran, Foment Torisme Val d’Aran (FTVA), a presentat era memòria sus es accions amiades a tèrme pendent er exercici 2015. En aguest acte, era conselhèra de Torisme e Desvolopament Economic d’Aran, Anna Díaz, a realizat ua revision de totes es mesures realizades per FTVA pendent eth 2015.
En paraules dera conselhèra de Torisme e Desvolopament Economic d’Aran, Anna Díaz “er objectiu ei mostrar totes aqueres accions e iniciatiues amiades a tèrme ena matèria de promocion e comercializacion. Des deth Govèrn d’Aran non se concep ua politica toristica sense era participacion ne era coordinacion entre eth sector public e privat. D’aguesta manèra ei mès eficienta e eficaça e, donques, se pòt hèr mès damb mens recorsi”.
Er an 2015, era destinacion de Catalonha que mès creishec toristicament siguec era Val d’Aran, en tot èster era destinacion escuelhuda per mès de 221.010 viatgèrs lotjadi enes establiments otelèrs, un 4,75% mès qu’er an 2014, que generèc mès de 660.000 pernoctacions, un 8,78% mès qu’er an anterior.
Eth torisme estrangèr a representat en an 2015 eth 22% dera demanda dera Val d’Aran, aguesta tendéncia ei eth resultat der esfòrç realizat per FTVA ena promocion dera destinacion en mercat estrangèr.
En çò que tanh ath servici d’informacion e acuelhuda deth visitant, es burèus de torisme atengueren a mès de 57.000 toristes, 89% d’eri en burèu de torisme de Vielha. En tot somar es auti punts d’informacion toristica dauridi temporauments, era chifra totau de visitants atengudi ascendís a 68.590 persones.
En çò que tanh ara accion de marqueting se setièc enes tres pilars: comercializacion, promocion e comunicacion. Era inversion publicitària enes mejans convencionaus se redusic en favor dera preséncia on-line, en tot destacar importantes campanhes en agéncies e hilats sociaus. Naues edicions de materiau imprès; era participacion en accions de promocion en collaboracion damb era Agéncia Catalana de Torisme, eth Patronat de Torisme de Lhèida e era plataforma Pirenèus; era adesion ara plataforma Catalonha Convention Bureau e ena Barcelona Film Commission; IDAPA; era assisténcia a hèires, jornades e viatges de receptiu; es diuèrses accions de promocion ath public finau e era promocion deth comèrç e era formacion heren part des accions amiades a tèrme ath long der an.
Eth pressupòst destinat a torisme pendent eth 2015 siguec de 700 mil èuros.
Era Val d’Aran acuelhec pendent eth 2015 a equipes d’espòrt d’elèit que realizèren eth sòn “stage” entà premanir era sason, ath delà, era Val d’Aran, destaque per aufrir un ample ventalh d’activitats dirigides ath torisme familhar. Eth certificat Biosphere Destination, de mans dera UNESCO e dera Organizacion Mondiau de Torisme, arreconeish eth trabalh que se realize des dera Val d’Aran en favor d’ua gestion responsabla e sostenible deth Torisme. D’aguesta manèra, se convertís ena prumèra destinacion de montanha en obtié’c.
Es principaus destinacions d’origina contunhen d’èster Catalonha, Madrid, País Basc e Valéncia. Es visitants francesi son es principaus visitants estrangèrs mès damb un aument considerable de toristes que provien de Gran Bretanha, atau coma d’auti païsi coma Israèl o Russia.
Plan estrategic 2016-2020
Tanben s’a presentat eth Plan Estrategic 2016- 2020 a on eth programa de Marqueting ei çò que presente mès accions considerades damb besonh de contunhament, es mès considerables son es de promocion, desestacionalizacion e imatge de mèrca. Deth programa de servicis ena destinacion destaquen es accions de qualitat e sostenibilitat, intelligéncia Toristica e creacion de producte.
Era conselhèra, Anna Díaz, a soslinhat “era marca Val d’Aran ei ua marca de toti, se poténcie, foncione e ei fòrça ben vinculada e plaçada. Auem dessenhat un plan de gestion excellent entà poder trèir eth maximal rendiment e rendabilitat e poder vedé’c reflectit en torisme deth nòste país. Sajaram de mantier es nòsti mercats e incrementar uns auti que comencen a vier”.
Vielha, 8 de abriu de 2016
Conselh Generau d’Aran: Núria Sanjuan