Dissabte passat, 6 d’agost, se celebrèc ena Val d’Aran era prumèra edicion d’“Era Flower Power”, hèsta tematica e divertida famosa en fòrça lòcs, en tot èster era hèsta der ostiu per excellència, qu’arrebrembe eth passat hippy dera epòca des 60 e 70.

Fòrça abitants dera Val d’Aran e toristes, mainatges e majors, gaudiren en Vielha d’ua explosion de colors e flors, damb diferenti espacis de léser organizat damb talhèrs, concèrts e activitats entà totes es edats.

Pera net, eth punt finau ac metec eth Gran Guateque a on es assistents gaudiren damb musica des ans 60 e 70 enquiara maitiada, damb tòies de productes esponsorizats.

Era conselhèra de Torisme e Desvolopament Economic d’Aran, Anna Díaz, a manifestat “era Flower Power da eth trèt de gessuda ara campanha d’ostiu ena Val d’Aran”.

Pera sua banda, Mercè Pastor, des dera organizacion d’“Era Flower Power” a soslinhat “arregraïsqui era confidança a totes es entitats: Ajuntament de Vielha e Mijaran, Torisme Val d’Aran, Grèmi d’Ostalaria dera Val d’Aran, Aran-Thal e toti es sòns monitors”. Tanben arregraís “a toti es patrocinadors e collaboradors qu’an apiejat er eveniment. E sense cap dobte, gràcies a toti es qu’an aportat eth sòn esfòrç d’ua forma desinteressada e de còr, en tot dar lo melhor de cadun: Esther F., Mónica, Alma, Trini, Laia, Gemma, Mª Cinta (Bollywod damb Maria), Juanma P., Ambrós, Oriol, Almansa, Jose Antonio, Toño,…e, sustot a Sebas per creir en jo”.

Vielha, 12 d’agost de 2016

Conselh Generau d’Aran: Núria Sanjuan

Hònt: Era Flower Power/ Mercè Pastor