Grani resultats des esportistes deth Centre d’Espòrts d’iuèrn Adaptat d’Aran

astrid fina_ JESUS ORTIZEra esportista Astrid Fina. Foto: Jesús Ortiz

 

Er esportista dera FEDPC Roger Puig, participèc es dies 19 e 20 de març enes carrères deth circuit IPCAS dera estacion francesa dera Moura, a on artenhec ua magnifica tresau plaça en Eslalom e dusau en Gigant.

Es dies 21 e 22 de març se disputèren es Campionats Nacionaus de França, a on er esportista artenhec ua tresau plaça en Eslalom en tot hèr concurréncia contra er elèit francés.

Pera sua banda, era Equipa Nacionau de para-sonowboard que se trobaue aguesti madeishi dies en tot hèr concurréncia enes Campionats Nacionaus d’Itàlia, artenhie dues dusaus posicions des sòns esportistes Astrid Fina e Oier Zabala dera FEDDF.

Ja en Pas de la Casa, a on dies dempús se celebrarien es Campionats d’Espanha d’Esquí Adaptat e es prumèrs Campionats d’Espanha de para-surf de nhèu, eth joen esportista dera FEDPC, Jaime Almenar, artenhec eth dia 21 de març, era prumèra posicion en Gigant des Campionats d’Andòrra.

Es dies 23, 24 e 25 de març s’amièren a tèrme es pròves d’Eslalom, Gigant e SuperG des Campionats d’Espanha, a on de nau Roger Puig, artenhec es tres aurs, en tot obtier Jaime Almenar, dus argents enes modalitats de gigant e supèr e un bronze en eslalom.

Ath sòn torn, eth dia en 24 març, s’amièren a tèrme es pròves d’accès enes diferenti programes esportius deth Cdia d’Aran (Centre d’Espòrts d’Iuèrn Adaptat) entara pròplèu sason 2015/2016, a on es participaires sigueren avaloradi era carrèra a nivèu tecnic pes seleccionaires nacionaus d’esquí adaptat e para-snowboard, realizèren entrevistes personaus damb era psicològa deth Cdia d’Aran e pròves fisiques d’avaloracion generau.

Entath barrament des Campionats, immediataments dempús d’acabar era pròva de SuperG, se dèc pas as rondes eliminatòries deth Snow Boarder Cross que classifiquèren as participaires entàs rondes per cobles.

Prumèra organizacion des Campionats d’Espanha de para-surf de nhèu qu’auec 4 participaires des federacions, catalana, basca, andalosa e un convidat dera seleccion Argentina, Oscar Thomatis qu’obtenguec er aur dera pròva, en tot demorar Oier Zabala coma argent e Campion d’Espanha, atau coma Astrid Fina.

Se barren atau ues magnifiques jornades de campionats nacionaus damb 55 participaires de diferentes federacions e classes, e fòrça bones perspectives entara pròplèu sason entàs compausants dera equipa deth Cdia d’Aran.

Comments are closed.