Vielha, 7 d’abriu de 2017.- A compdar de deman dia 8 enquiath 31 d’abriu, se poderà visitar era naua exposicion deth Musèu dera Val d’Aran ena glèisa de St. Joan d’Arties, jos eth títol “Impressions dera Val”, dera artista Maite Ordériz.

Era exposicion se compause de 60 òbres restacades damb era Val d’Aran, a trauès d’impactants imatges de païsatges e scenaris bucolics, era experimentacion dera artista damb diuèrsi materiaus que van des d’ òlis, aquarèlles e acrilics, includint era fotografia.

Era exposicion represente era riquesa naturau e patrimoniau dera Val d’Aran a trauès de pincelades plees de dinamisme e color. Era emprenta deth pas deth temps ena Val se manifèste enes òbres, que mos pòrten a reflexionar sus es efèctes des cambis de sason e es modificacions des païsatges pera interaccion natura-òme.

Maite Ordériz, manten un especiau vincle damb era Val d’Aran, tèrra que visite des de hè lèu 30 ans. Era fusion dera sua dobla faceta coma artista e biològa da lòc a òbres d’ua grana sensibilitat artistica e admiracion pera natura deth territòri.

Era inauguracion dera exposicion serà aué diuendres 7 d’abriu, ena glèisa de St. Joan d’Arties.