Inauguracion dera exposicion “Lum ena anma. Palmira Jaquetti, 1895-1963” en Ecomusèu çò de Joanchiquet de Vilamòs

  • Aguesta tarde, entàs 19:00 ores, aurà lòc era inauguracion d’aguesta exposicion qu’a coma protagonista a Palmira Jaquetti, ua hemna polifacetica que hèc granes aportacions a nivèu musicau, literari, pedagogic e umanistic, en ua epòca ena quau non siguec valorada intellectuaument pera sua condicion d’hemna

Er hilat de Musèus dera Val d’Aran acuelh en Ecomusèu çò de Joanchiquet ua des exposicions itinerantes mès subergessentes d’enguan, ua exposicion qu’a coma protagonista a Palmira Jaquetti.

Er objectiu dera exposicion ei trèir ara sua figura der anonimat, en tot reconéisher e divulgar eth trabalh de tota ua vida. Per un costat, participèc activament enes missions de recèrca de cançons dera òbra deth Cançoner Popular de Catalunya. Ath delà, deishec constància dera vida en mon rurau des ans 20 e 30 enes memòries des sòns viatges e trabalhs de camp. Poetèssa destacada, participec enes Jòcs Floraus hestejadi dehòra de Catalunha e recebec quauqui prèmis.  Coma compositora, armonizec cançons e deishec ua òbra qu’encara ei per descorbir.

Era exposicion, que conmemòre es 125 ans deth naishement de Palmira Jaquetti Isant (Barcelona, 21 de seteme de 1895 – Els Monjos, 8 de mai de 1963), ei ua iniciativa deth Departament de Cultura de la Generalitat de Catalunya, a trauès dera Direcció General de Cultura Popular i Associacionisme Cultural.

Era inauguracion dera exposicion aurà lòc aué, dijaus 22 de junhsèga, entàs 19:00 ores e se poderà visitar enquiath 6 de seteme de 2021.

Pendent era inauguracion d’aué s’amiarà a tèrme un petit repàs pera vida e òbra d’aguesta hemna polifacetica e se darà a conéisher part deth sòn legat poetic. Es places son limitades e ei de besonh confirmar assisténcia via corrèu electronic en dir.museu@aran.org.

Comments are closed.