Luís Carlos Medina vice-sindic d’Aran, presidís era reünion deth COPLOA entre eth CGA e era DGPL

Era darrera setmana s’amassèren en Barcelona es membres deth COPLOA (Conselh de Politica Lingüistica der Occitan – Aranés) e dera DGPL (Direccion Generau de Politica Lingüistica dera Generalitat de Catalonha) en session presidida peth vice-sindic d’Aran, Luís Carlos Medina, a fin d’auançar enes trabalhs de coordinacion entre era Generalitat de Catalonha e eth CGA a trauès d’aguest organisme qu’a estat eth veritable impulsor dera conversion deth IEA (Institut d’Estudis Aranesi) ena Academia Aranesa dera Lengua Occitana.

DSC_0607

Era reünion servic entà qu’eth president deth IEA – Academia Aranesa dera Lengua Occitana Jusèp Loís Sans, metesse ath dia as assistents sus es darrèri trabalhs impulsadi pera Academia, coma era publicacion dera edicion des discorsi des membres dera Academia prononciada eth dia der acte inaugurau, era prumèra Nòrma Ortografica sus er Occitan estandard, e era edicion dera prumèra Gramaticiana Basica d’Occitan -Aranés, atau coma des trabalhs que s’amien a tèrme des deth Departament de Politica Lingüistica deth Conselh Generau d’Aran.

Xavier Bernadí, secretari deth COPLOA profitèc era trobada entà informar dera resolucion en positiu des discordàncies competenciaus sus era Lei d’Aran, sometudes peth Govèrn der Estat, manifestades en relacion as articles 5, 8, 48 e 53, era Disposicion addicionau prumèra, disposicion addicionau dusau e era disposicion finau cincau dera Lei 1/2015, de 5 de hereuèr, deth Regim Especiau d’Aran. Damb aguest acòrd se mantien articles fonamentaus de contengut dera Lei d’Aran coma eth deth non includiment d’Aran en cap division territoriau ne administrativa de Catalonha que non sigue era madeisha, se manten eth contorn competenciau, eth dret a decidir e eth procès informatiu sus eth contengut d’aguesta Lei, atau coma er emplec preferent der aranés ena Val d’Aran.

Era reünion servic tanben entà debàter sus era possibla revision, en marc dera Comission de Toponimia, dera forma oficiau deth toponim Val d’Aran o Aran.

 

DSC_0610 DSC_0608

Comments are closed.