• Eth Conselh Generau d’Aran a hèt diuèrsi trabalhs de reconstruccion e reparacion de murs damb aguest materiau en camins deth terçon de Marcatosa.

Damb aguestes accions s’an apariat quate murs de pèira seca plaçadi en camins d’Aubèrt, Arròs e Vila, qu’auien queigut ath long des mesi d’iuèrn e que podien afectar era seguretat des usatgèrs.

Entara sua reparacion s’an aplicat tecniques tradicionaus de construccion de pèira seca, entà garantir era estabilitat des murs e conservar-ne eth valor patrimoniau.

Er art dera construccion de pèira seca siguec includit ena Lista Representativa deth Patrimòni Culturau Immateriau dera UNESCO en 2018, en reconeishement ath sòn valor culturau e tradicionau.

Eth pressupòst des intervencions a estat de 12.388 euros, finançadi peth Departament de Territòri, Abitatge e Transicion Ecologica dera Generalitat de Catalonha.

Aguestes intervencions son part des trabalhs de conservacion deth hilat de camins tradicionaus d’Aran, un patrimòni que permet comunicar es pòbles e territòris e per a on cada an i transiten tant es vesins com es visitaires.

Aguesti camins son especiaument freqüentadi entà practicar activitats com eth senderisme, eth trail running o eth ciclisme de montanha, entre d’autes.

Eth manteniment e conservacion d’aguest hilat contribuïssen atau a garantir era seguretat, era accessibilitat e era preservacion deth patrimòni tradicionau aranés.

Vielha, 20 d’agost de 2026