Er objectiu deth Mastèr ei coordinar eth trabalh deth personau sanitari damb eth personau d’emergéncies, entà méter en situacion es accions d’uns e d’auti.

 

 

Deth 10 ath 12 d’abriu era Val d’Aran acuelh ua naua edicion deth Mastèr d’Atencion Pre espitalària e Espitalària Urgenta MAPHU: Mòdul d’AMV (Atencion damb Multiples Victimes) e Atencion en Montanha.

 

 

Eth Mastèr ei organizat peth Conselh Generau d’Aran damb era collaboracion dera Universitat de Barcelona, Pompièrs e Emergéncies d’Aran e er Institut de Formacion Contunha de Catalonha. Es activitats deth Mastèr compden damb era collaboracion deth Servici Aranés de Benéster e Salut (SABS) e dera enterpresa Eliance.

 

 

Eth MAPHU ei dirigit per Javier Colina, professor titular d’Infirmeria dera UB, e Fran Cardeñes, director tecnic de Pompièrs e Emergéncies d’Aran, e coordinat per Juanmi Riu, Àlex Orna, Xavier Bernárdez e Fran Tébar.

 

 

Er objectiu deth Mastèr ei coordinar eth trabalh deth personau sanitari damb eth personau d’emergéncies, entà méter en situacion es accions d’uns e d’auti. Cau rebrembar que mès deth 60% deth personau d’infermeria deth SEM (Sistèma d’Emergéncies Medicaus dera Generalitat de Catalunya), an passat peth Mastèr d’Atencion Pre espitalària e Espitalària Urgenta pendent es darrèri ans.

 

 

Es estudiants deth Mastèr artenheràn coneishements sus materiau de montanha, maniòbres de seguretat damb elicoptèr, foncionament e estructura deth Grop de Rescat de Montanha, coneishements deth materiau de rescat d’iuèrn, rescat en lauegi, tractament en hipotermia, reanimacion de victimes enterrades e sessions d’abilitats ena atencion a multiples victimes, entre d’auti.

 

Es activitats se desvoloparàn en sessions de maitin e vrespada en disparièrs lòcs dera Val d’Aran.

 

 

 

 

 

 

Vielha, 11 d’abriu de 2019

 

Conselh Generau d’Aran: Núria Sanjuan