Er ex corredor, entrenador e actuauments director tecnic deth CAEI dera Val d’Aran se presente as eleccions ara presidéncia dera RFEDI.
Es eleccions, que seràn eth 20 de seteme, ara RFEDI compden des d’aué damb un candidat de 42 ans qu’a passat per toti es estadis der espòrt blanc.
Neishut ena Val d’Aran, May Peus España, siguec esquiador d’aupin e siguec en equip nacionau entà dempús dedicar-se a entrenar eth Club Aranés d’Espòrts d’Iuèrn (CAEI) a on actuauments ei director tecnic.
Mès protagonisme d’esportistes e tecnics
May Peus España ei convençut qu’era Reau Federacion Espanhòla d’Espòrts d’Iuèrn a de besonh un cambi a on es esportistes e tecnics agen mès protagonisme e poder de decision.
Enes sues prumères paraules dempús de hèr publica era sua intencion de presentar-se a president dera RFEDI a comentat que pendent era sua carrèra a gaudit des espòrts d’iuèrn en totes es sues facietes e nivèus: coma esportista, entrenador e gestor. Segons Peus España “era mia experiéncia en aguesti 20 ans damb era gestion der espòrt base e era mia illusion entà impulsar era nhèu espanhòla m’an hèt a dar aguest pas damb era intencion de liderar un projècte de futur de toti/es e entà toti/es”.
Trabalh en equip e naues vies de finançament
Eth candidat assegure qu’entà arténher era presidéncia dera RFEDI forme un equip “multidisciplinari capable de dialogar, illusionar e innovar entath compliment d’uns ambiciosi objectius esportius”. En un moment economic dur entàs federacions e er espòrt en generau, Peus España assegure qu’“amiaràn a tèrme accions que haràn possible era creacion de naues vies entara obtencion de recorsi economics”.
Peus España, que siguec coordinador d’infantils dera RFEDI en prumèr mandat d’Eduardo Roldán, assegure qu’era sua candidatura “non ei de confrontacion damb arrés se non un projècte integrador e seriós en quau èm convençudi qu’Espanha a granes fortaleses latents e era mia intencion ei profitar-les e desvolopar-les”.
Pera sua part, Carlos Barrera, sindic d’Aran, a manifestat “coma aranés e coma sindic d’Aran, tot eth mèn supòrt e deth Govèrn aranés a May Peus España en aguesta naua iniciatiua, ena quau li desiram fòrça exits”.