Mès de 200 aficionadi ath ciclisme participen ena pedalada populara “La Fête du Tour” organizada peth Conselh Generau d’Aran

Vielha, 5 de junh de 2016.- Mès de 200 ciclistes aficionadi de totes es edats, an participat aué ena pedalada populara “La Fête du Tour” organizada peth Conselh Generau d’Aran damb era collaboracion der Ajuntament de Vielha, que s’a celebrat aué ena Val d’Aran.

Era pedalada a agut dues parts, era prumèra damb gessuda as 9 ores deth maitin des dera plaça deth Conselh Generau d’Aran, a seguit eth recorregut Vielha-Portilhon-Vielha, damb eth punt d’avitalhament entàs corredors en guardader deth pòrt deth Portilhon, a on eth passat 27 de mai s’inaugurèc un monolit commemoratiu des sèt guanhadors espanhòus deth Tour de França, Federico Martín Bahamontes, Luis Ocaña, Pedro Delgado, Miguel Induráin, Oscar Pereiro, Alberto Contador e Carlos Sastre, que s’a ja convertit en punt de parada obligatòria entà toti es aficionadi ath ciclisme.

As 12 ores deth meddia, toti es participaires en aguest recorregut, s’an somat as que demorauen en parcatge de Vielha, entà hèr un circuit en biciclèta per tota era poblacion, qu’an participat en eth aficionadi de totes es edats, en tot arténher ua grana participacion en aguesta iniciatiua prealabla ara 9au etapa deth Tour 2016, que gesserà de Vielha-Val d’Aran, eth pròplèu 10 de junhsèga.

La Fête du Tour, finalizèc damb eth liurament de prèmis deth concors de diboish organizat peth Conselh Generau d’Aran, qu’an participat en eth mès de 250 alumnes de 1èr, 2au, 3au, 4au, 5au e 6au de Primària des escòles dera Val d’Aran. Toti es participaires an arrecebut ath fenir ua camiseta commemorativa dera sua participacion ena prumèra edicion d’aguesta pedalada populara.

Damb un traçat inedit enquia ara ena istòria dera carrèra, era 9au etapa deth Tour de França 2016 gesserà de Vielha-Val d’Aran eth pròplèu 10 de junhsèga e aurà un recorregut de 184,5 km en tot passar per 5 pòrts de montanha. Era etapa aranesa ei ua des escuelhudes pera organizacion entà èster emetuda integralaments en dirècte per television.

Guanhadors deth concors de diboish “La Fête du Tour”