Mès de 25.000 persones en Vielha-Val d’Aran ena 9au etapa deth Tour de França 2016

Vielha, 10 de junhsèga de 2016.- Mès de 25.000 persones, segontes hònts dera organizacion, an presenciat era gessuda e eth pas dera 9au etapa deth Tour de França 2016 pera Val d’Aran.

Era 9au etapa, ua des mès dures dera edicion d’enguan deth Tour de França, damb 184km e 5 pòrts de montanha, a gescut des de Vielha-Val d’Aran.

IMG_0347

“Eth nombre d’assistents a superat es nòstes expectatives” a declarat eth sindic d’Aran, Carlos Barrera, ena prumèra avaloracion des resultats dera etapa aranesa deth Tour. Barrera, a volut arreconéisher “er esfòrç deth Govèrn d’Aran, de toti es departaments implicadi deth Conselh Generau d’Aran, e de tota era Val d’Aran, que se metec a trabalhar des deth prumèr dia entà arténher qu’era organizacion d’ua gessuda d’etapa deth Tour siguesse un èxit de repercussion internacionau” a ahijut.

Es accions començades peth Conselh Generau d’Aran s’inicièren en mes de mai, en tot presentar era etapa en burèu de Torisme de Val d’Aran e Baqueira Beret en Toulouse.

Er acte damb major repercussion prealable ara etapa siguec quan eth govèrn aranés hec un omenatge as sèt ciclistes espanhòus qu’an guanhat eth Tour de França, Federico Martín Bahamontes, Luis Ocaña, Pedro Delgado, Miguel Induráin, Óscar Pereiro, Carlos Sastre e Alberto Contador, en tot inaugurar un monolit en sòn aunor en Guardader deth Portilhon, que s’a convertit en punt de parada obligatòria entà toti es aficionadi ath ciclisme. Dempús vengueren, era pedalada populara “La Fête du Tour” que i participèren mès de 200 ciclistes aficionadi de totes es edats, e eth concors de diboish organizat peth Conselh Generau d’Aran, que compdèc damb era participacion de mès de 250 alumnes de primària des escòles dera Val d’Aran.

Aguest dimenge, abans dera gessuda dera etapa deth Tour, s’a inaugurat “eth Corneret de Luís Ocaña”, ena EMD d’Arròs e Vila, en arrebrembe des ans viscudi peth vencedor espanhòu deth Tour en an 1973 e era sua familha, ena Val d’Aran.

IMG_0184

Eth vicesindic d’Aran, Luís Carlos Medina, eth conselhèr de Territòri, José Antonio Boya, e era conselhèra de Torisme e Desvolopament Economic, Anna Díaz, an volut arregraïr as patrocinadors e collaboradors er esfòrç realizat pendent es mesi prealables entara organizacion dera gessuda d’ua des etapes reina dera edicion deth Tour d’enguan, sense aguesta participacion non aurie estat possibla assumir aguest rèpte, coma son es ajuntaments de Naut Aran e Vielha e Mijaran, Diputacion de Lhèida, Baqueira Beret, Agéncia Catalana de Torisme, e era Secretaria Generau der Espòrt dera Generalitat de Catalonha. Atau coma es Volontaris d’Aran, era multitud d’enterpreses locaus e ciutadans a nivèu individuau, qu’an collaborat ena organizacion.

Actuauments eth Govèrn d’Aran, se tròbe en tot analisa es donades d’impacte economic dera etapa deth Tour, que contemple er increment de pernoctacions ena Val d’Aran en aguesta prumèra quinzea de junhsèga, er increment de despensa des clients en restaurants e comèrci; e çò qu’a supausat d’impacte en mejans de comunicacion, “èm convençudi qu’assumir eth rèpte d’organizar ua etapa deth tresau eveniment esportiu mès important deth mon, servirà a mostrar era belesa dera Val d’Aran e entà dà’c a conéisher coma destinacion damb ua excellenta aufèrta toristica, que volem aufrir pendent tot er an as nòsti visitants” a ahijut Anna Díaz.

IMG_0308 IMG_0670 IMG_0675 IMG_0473 IMG_0524IMG_0569

 

IMG_0600

IMG_0642

Comments are closed.