Musèus Val d’Aran barre era tempsada d’ostiu damb ues donades fòrça positives

Era chifra de visitants se manten en nombres similars ara der an anterior, a despièch qu’er aforament enguan s’a vist limitat ath 50% entà garantir era seguretat des visitants pr’amor dera situacion sanitària

Dempús de tres mesi de confinament, enes quaus er Hilat de Musèus dera Val d’Aran non deishèc de trabalhar, en mes de junhsèga es musèus aranesi tornèren a daurir es sues pòrtes, en tot implementar totes es mesures de besonh entà garantir era seguretat de visitants e trabalhadors e es resultats obtengudi an estat fòrça positius deuant era situacion actuau.

Ena sason d’ostiu d’enguan, que s’a alongat deth 13 de junhsèga enquiath 13 de seteme, s’an daurit mès equipaments des abituaus, en tot includir guides en practicament toti eri.

En totau, ath torn de 10.000 visitants an gaudit d’aguestes infraestructures, ua chifra que se manten respècte ara d’auti ostius, en tot auer en compde qu’era capacitat des equipaments s’a restringit a un 50% deth sòn aforament. Es visites que mès interès an desvelhat enguan an estat era Mina Victòria (damb 3.282 visitants) e era Rota Romanica d’Aran (ena qu’an participat 2.324 visitants), es quaus an creishut respècte ar ostiu anterior.

Coma nauetat, s’an ampliat es visites guidades. S’a podut dar a conéisher era Mòla d’Unha, s’a recuperat era visita dera glèisa de Sant Andreu de Salardú, s’amièc a tèrme era conferéncia “Eth Quatau Cavalèr dera Apocalipsi”, a cargue de J. Carles Riera Socasau, que dèc a conéisher es epidemies des sègles XIX e XX ena Val d’Aran, tèma istoric damb fòrça interès ena actualitat.

Era situacion de pandemia actuau a provocat era cerca de naues formes entara gestion der accés deth public as visites guidades e equipaments. En tot profitar es naues tecnologies, des deth Conselh Generau d’Aran, a trauès der Hilat des Musèus dera Val d’Aran, s’a trabalhat en desvolopament e implementacion d’un sistèma de resèrves pròpi, que permet crompar en linha es entrades.

Aguesta plataforma respon a un doble objectiu. Per un costat, garantir era seguretat des visites, en tot establir un contròl efectiu des aforaments, evitar er escambi de sòs en efectiu e informar sus es mesures prevencion dera COVID-19. Per un aute costat, servir de miei de difusion actualizat dera aufèrta culturau ath long de tot er an, se da informacion detalhada des equipaments a visitar, en tot poder accedir a contenguts audiovisuaus e informacion practica.

Era situacion actuau, amassa damb ua nauta afluéncia toristica non demorada, a supausat un esfòrç extra ena organizacion e gestion des fluxes de visitants en ostiu. Er increment des visitants, fòrça notable en mes d’agost, a representat un rèpte entà poder limitar er accés e complir damb es aforaments. Eth personau d’ostiu, d’acòrd damb eth protocòl de seguretat, a estat eth responsable de hèr des visites ua experiéncia segura e de qualitat entà toti es usatgèrs des musèus.

En çò que hè ara procedéncia des usatgèrs e usatgères der Hilat de Musèus dera Val d’Aran, era majoria des visitants procedie deth territòri catalan, un public que s’a vist aumentat, en detriment deth visitant estrangèr. Per un aute costat, eth public locau contunhe fidèu as naues iniciatiues que se desvolòpen des deth Musèu dera Val d’Aran, damb especiau interès enes conferéncies e visites teatralizades, activitats a on eth visitant aranés a estat eth majoritari.