Nau atac confirmat der os Cachou a ua cavala

  • Eth sindic d’Aran a destacat que, damb aguesta naua mòrt, Cachou se trape ath limit de çò que mèrque eth protocòu entà èster extret deth miei

  • Era amassada sus aguesta problematica que s’anaue a mantier deman damb eth Secretari d’Estat de Miei Ambient, Hugo Morán, s’a agut de posposar degut ara dramatica situacion dera DANA

Ager se podec constatar qu’er os Cachou depredèc ua auta cavala, aguesta d’un an e miei, era net deth 4 de seteme. Er atac non auie estat detectat enquiara e s’a podut descorbir gràcies ara senhau deth colièr GPS de Cachou.

Diuèrsi signes ena pèth dera cavala an servit entà demostrar qu’er autor d’aguesta mòrt a estat er os.

Damb aguesta dejà son tres es baishes de bestiar equin atribuïdes a Cachou en sonque sies dies, entre eth 4 e eth 10 de seteme. Eth sindic d’Aran, Francés Boya, a reïterat era sua “preocupacion pera agressivitat d’aguest exemplar, que damb aguest nau atac se trape ath limit de çò que mèrque  eth protocòu entà èster extret deth miei”.

Es mesures de condicionament aversiu son de dificil aplicacion en aguest tipe d’ossi, pr’amor que non son abituadi ara preséncia umana e presenten un comportament nocturn e esquiu envèrs er òme.

Des deth Conselh Generau d’Aran dejà s’a mostrat eth compromís de protegir es interèssi des ramadèrs aranesi deuant d’aguesta problematica e, de hèt, s’auie programat ua amassada tà deman, 17 de seteme, damb eth Secretari d’Estat de Miei Ambient, Hugo Morán, entà tractar aguest ahèr, mès s’a agut de posposar degut ara dramatica situacion dera DANA que se patís en quauques comunitats.

Comments are closed.