Nau servici d’otorrinolaringologia en Espitau Val d’Aran gràcies ara aliança estratègica damb er Hospital del Mar

  • Pr’amor d’aguesta aliança, er Espitau Val d’Aran compdarà damb ua franja mensuau de consultes damb especialistes der airau d’otorrinolaringologia der Hospital del Mar de Barcelona, qu’ath delà tanben poiràn amiar a tèrme determinades cirurgies en Aran e auer un seguiment des pacients en aguesta especialitat

Era Val d’Aran compde, des deth mes de noveme, damb mès servicis en airau d’otorrinolaringologia pr’amor dera naua aliança estrategica entre er Espitau Val d’Aran e er Hospital del Mar de Barcelona.

Per miei d’aguesta collaboracion, er Espitau Val d’Aran non sonque compde damb ua franja de consultes damb especialistes der Hospital del Mar en aguest airau, senon que tanben se daurís era possibilitat de poder amiar a tèrme determinades cirurgies en Aran, ath delà d’auer un seguiment des pacients.

Es especialistes der Hospital del Mar visitaràn as pacients dera Val d’Aran dus còps ath mes e s’a designat un gestor de casi en Espitau Val d’Aran entà atier es besonhs que poguen sorgir en aguesta especialitat.

Era sindica d’Aran, Maria Vergés, a arregrait “era predisposicion der Hospital del Mar entà establir aguesta aliança estrategica damb er Espitau Val d’Aran, gràcies ara quau podem reforçar ua especialitat medicau important entath territòri” e hig que: “èm conscients de qu’era manca de professionaus especialistes ei ua des principaus problematiques deth nòste sistèma sanitari, e per aguest motiu auem trabalhat entà arténher cobrir places en airaus tan importants coma traumatologia, ginecologia, anestesiologia, cirurgia e atencion primaria, e ara reforçar tanben eth servici d’otorrinolaringologia”.

En aguest sens, Vergés manifèste que: “a despièch deth COVID-19, e d’acòrd damb eth critèri des professionaus sanitaris, eth nòste interès ei reforçar era atencion medicau que non a relacion damb eth COVID-19 e qu’enes darrèri mesi s’a vist condicionada pera luta contra eth virus”.

Comments are closed.