• 24 mestieraus de diferenti sectors participen ena hèira damb era venta de productes locaus
• Pendent es diferentes jornades auràn talhèrs e se realizarà ua tòia d’ua cistalha damb productes artesanaus
Vielha acuelh ua naua edicion dera hèira Hèt a man, hèt aciu, qu’organize eth Conselh Generau d’Aran, e que debanarà enquiath 23 d’agost. Se tracte d’ua hèira que ja s’a assentat pendent er ostiu ena Val d’Aran, damb er objectiu de promòir as mestieraus e es productes locaus.
Enguan era hèira compde damb un totau de 24 productors de diferenti sectors: paèrs, veire, ceramica, bijuteria, alimentacion e texil entre uns auti. Ua grana representacion dera produccion artesanau que s’elabòre ena Val d’Aran.
Era conselhèra de Torisme e Desvolopament Economic d’Aran, Anna Díaz, en un stand dera hèira.
“Hèt a man, hèt aciu, ei ua grana oportunitat pr’amor que tant es aranesi coma es visitants que i a ena Val d’Aran en ostiu, poguen conéisher es diferenti sectors artesanaus dera man des sòns productors, que representen ua activitat importanta laguens deth comèrç locau”, a comentat aué pendent era inauguracion dera hèira, Anna Díaz, conselhèra de Torisme e Desvolopament Economic d’Aran.
Pendent es 3 dies, es visitants ara hèira poderàn apropar-se as estands entà crompar es productes. Ath delà, pes tardes poderàn gaudir de diferenti talhèrs amiadi a tèrme pes madeishi productors.
Ara fin dera hèira, eth dimenge 23 d’agost, entàs 20:00 ores, se realizarà era tòia d’ua cistalha damb diferenti productes mestieraus des diferenti estands participants.
Er orari dera hèira serà de 10h30 a 14h30 e de 16h30 a 21h00 en Passèg dera Libertat de Vielha.
TALHÈRS DE “HÈT A MAN, HÈT ACIU”
Diuendres 21 d’agost:
• De 17h30 a 19h30:
– Talhèr de bombes e saus de banh a cargue de Sabons Careça
– Hèm un tampon!, a cargue d’Alicia Mitjans
Dissabte 22 d’agost:
• De 17h30 a 19h30:
– Talhèr damb lan tàs grani e petiti dera familha a cargue deth Talhèr textil de Bausen
– Elabora ua minjadora tà audèths a cargue de Paèrs Bausen
Dijaus 23 d’agost
• De 17h30 a 19h30:
– Decòra e pinta era tua caisheta a cargue d’Olga Zubatii
– Talhèr de clauèrs e bracelets a cargue de Baobab Artesania