Vielha, 10 de març de 2017.- Es Pompièrs d’Aran an presentat aguesta setmana es naues equipes de proteccion individuau (EPI).

Eth Cap deth Parc de Pompièrs de Bossòst, Josep Maria Cau, expliquèc qu’es naues equipes aufrissen naues e melhores prestacions tecniques e supausen un cambiament ena imatge corporativa, en tot passar deth bordèus actuau ath color mostarda. Es equipes an estat liuradi a toti es membres deth còs de Pompièrs d’Aran.

Es naui EPI son de categoria 3; ei a díder, protegissen de perilhs mortaus o que pòden afectar seriosaments era salut. Son hèti damb teishut ignifug leugèr mès resistent ath madeish temps. Eth materiau emplegat ena sua fabricacion manten era resisténcia e era flexibilitat dempús d’èster exposat as ahlames. Incorpòre barreges de fibres que proporcionen ua nauta proteccion termica damb un anautit nivèu de confòrt, as usatgèrs, atau coma de durabilitat.

Era equipa cònste de pantalons, giqueta, arnesc, daga d’anèra cosuda e un parelh de mosquetons de seguretat. Eth contracte de renauiment deth nau EPI, includís tanben eth servici de neteja, mantenença, descontaminacion, emmagazinatge, traçabilitat e apariaments que siguen de besonh de totes e cadua des unitats liurades.