Òbres de condicionament der elipòrt de Vielha

Vielha, 24 d’agost de 2018.- Eth Conselh Generau d’Aran a trauès dera enterpresa Servicis Ambientaus dera Val d’Aran (SAVAS.L.) a començat aguesta setmana ua seria d’accions de neteja, tala d’arbes e desbrossament en elipòrt de Vielha entà garantir era seguretat der equipament de cara a assegurar era operativitat dera installacion es 24 ores ath dia, qu’ei prevista entath pròplèu mes d’octobre.

Aguesti trabalhs tanben s’amien a tèrme ena finca colindant damb er elipòrt qu’eth Conselh Generau d’Aran aqueric recentaments de cara ar ampliament d’aguesta installacion. Eth Govèrn d’Aran destine 30.000€ ad aguestes òbres deth barrament perimetrau der elipòrt de Vielha.

Aguestes accions s’enquadren laguens der acòrd entre eth Conselh Generau d’Aran e eth departament de Territòri e Sostenibilitat dera Generalitat entà ampliar er elipòrt de Vielha damb er objectiu que pogue èster un referent europèu en aguest tipe d’infrastructures. Er ampliament consistirà en assegurar era operativitat dera installacion es 24 ores ath dia, reformar es espacis interiors der actuau angar en zòna de servicis e sala de gestion d’emergéncies e installar un angar e ua plataforma de parcatge en terren adjacent.

Er elipòrt de Vielha, acuelh actuauments operacions deth Servici d’Emergéncies Medicaus, rescats de montanha, abituallamient e traslat de residus de refugis de montanha, atau coma de trabalhs aeriani en nauta montanha e de vòls toristics d’eliesqui. Damb es naues accions previstes se melhorarà era sua capacitat entà dar contunhitat ad aguestes operacions e acuélher d’autes naues.

Comments are closed.