Eth Plen deth Conselh Generau d’Aran a aprovat aué eth padron de crubament definitiu de entar an 2015 dera taxa deth servici de remassada de lordères e eth sòn tractament per un impòrt totau de 1.420.158,06 €.
MUNICIPI IMPÒRT ÈUROS 2015 IMPÒRT ÈUROS 2014
Arres 6.044,4 € 5.560,63 €
Bausen 5.971,87 € 6.359,08 €
Bossòst 105.646,36 € 105.972,63 €
Canejan 8.458,16 € 8.525,77 €
Es Bòrdes 25.038,32 € 24.963,16 €
Les 69.279,96 € 69.108,98 €
Naut Aran 533.346,55 € 532.314,72 €
Vielha-Mijaran 651.712,28 € 648.940,76 €
Vilamòs 14.660,16 € 14.708,38 €
TOTAU ÈUROS 1.420.158,06 € 1.416.454,11 €
“Era collaboracion des ciutadans en aguest servici, des dera realizacion deth reciclatge permet qu’eth Conselh Generau d’Aran age incrementat de forma substanciau eth percentatge de remassada selectiva, atau coma era sua qualitat”, a soslinhat eth sindic d’Aran, Carlos Barrera.
“Aguesta mielhora en reciclatge mos permet que s’incremente sonque un 0,3% es recebuts deth 2015 quan eth canon de depòsit en tarcumèr dera fraccion resta, per exemple, s’incremente un 21%”, destacaue eth conselhèr de Territòri d’Aran, Eduardo Valdecantos.
Tanben relacionat damb eth servici de lordères, eth Plen deth Conselh Generau d’Aran a aprovat eth projècte executiu de “Reforma e shamplit dera planta de recepcion e transferéncia de residus dera Val d’Aran”, per un impòrt 1.304.451,00 €, qu’en paraules deth sindic d’Aran, Carlos Barrera, “a de perméter auer ua installacion de prumèr nivèu entara gestion des lordères, que mos permeterà èster mès eficients en aguest procés de remassada, trigatge, e evacuacion des residus”.
En aute orden de causes, eth Plen deth Conselh Generau a nomentat ath vicesindic prumèr d’Aran e conselhèr d’Administracion Publiques, Finances e Coneishement, Luís Carlos Medina, coma representant deth Conselh Generau d’Aran en Consell d’Acció Exterior i de Relacions damb era Union Europèa, segontes çò que dispause era Lei 16/2014, de 4 de deseme, d’accion exteriora e de relacions damb era Union Europèa.
En paraules deth vicesindic d’Aran, Luis Carlos Medina, “eth Govèrn d’Aran arregraís ath Departament de Presidéncia dera Generalitat de Catalunya qu’age compdat damb Aran entà èster present en aguest Consell d’Acció Exterior, e aprofitaram entà dar a coneisher era singularitat e era identitat d’Aran en aguest òrgan”.
Eth Plen deth Conselh Generau d’Aran tanben a votat favorablement era mocion presentada per UA-PSC en relacion ara execucion dera tresau fasa der Institut d’Aran.
En aguest sens, eth sindic d’Aran, Carlos Barrera, a anonciat, qu’eth Departament d’Ensenyament dera Generalitat de Catalunya e er Ajuntament de Vielha e Mijaran he fòrça temps que trebalhen en aguesta linha e des deth Conselh Generau d’Aran auran tot eth nòste supòrt”.
Barrera, tanben a informat que pendent era primauèra, s’amiaran a tèrme es òbres d’arranjament e pavimentacion deth pati descobèrt deth CEIP Garona de Vielha e Mijaran, pr’amor qu’eth Departament d’Ensenyament e er Ajuntament de Vielha e Mijaran ja dispausen deth finançament de besonh entara execucion deth projècte redactat peth pròpi ajuntament.