• Foment Torisme Val d’Aran amassa damb Baqueira Beret seràn presents en Salon der Espòrt e Torisme de Montanha de Lhèida

• Era 2au edicion deth STM aufrirà deth 6 ath 8 de hereuèr mès de 30 prepauses entre carrères, jornades tecniques, conferéncies, demostracions e talhèrs

• Deman diuendres, dia 6 de hereuèr, a compdar des 18h30, se presentarà “Val d’Aran destinacion Biosphere” e se projectarà era pellicula deth 50 anniversari de Baqueira Beret

STM- Foto d’archiu der an passat

Era 2au edicion deth STM- Salon der Espòrt e Torisme de Montanha (STM) daurirà es sues pòrtes deman diuendres, dia 6 de hereuèr, en Lhèida damb un increment d’expositors (62), de superfícia neta d’exposicion (4.300 m2) e deth numerò d’activitats paralleles (31, 55% mès qu’en 2014). Er aument des activitats outdoor, a mès des carrères, e era preséncia de coneishudi esportistes d’especialitats extrèmes son tanben nauetats dera edicion d’enguan.

Eth STM qu’aurà lòc en Pabalhon 3 dera Hèira de Lhèida damb un orari de 10h00 enquiàs 20h00 ininterrompudament. Er objectiu deth salon, qu’inicièc era sua marcha eth passat an damb era vocacion de convertir-se en un punt de referéncia internacionau en sòn encastre, ei mostrar era aufèrta de torisme e espòrts de montanha deth país e d’ambdues vessants deth Pirenèus.

Foment Torisme Val d’Aran amassa damb Baqueira Beret seràn presents en STM e deman diuendres ena Sala de conferéncies deth Pabalhon 3, a compdar des 18h30, era conselhèra de Torisme, Comèrç e Consum d’Aran, Anna Díaz, presentarà “Val d’Aran destinacion Biosphere” e seguidament Baqueira Beret, dera man deth director comerciau de Baqueira Beret, Xavi Ubeira, presentarà eth vidèo deth 50 anniversari de Baqueira Beret. En tot acabar, en estand dera Val d’Aran/Baqueira Beret se poderàn degustar productes dera Marca de Garantia dera Val d’Aran.

Era organizacion preve acuélher uns 8.000 visitants.