Mès de 1.400 esportistes ena 37au Marxa Beret e eth Campionat d’Euròpa d’Esquí Nordic

Era estacion de Baqueira Beret acuelherà era 37au Marxa Beret e eth Campionat d’Euròpa d’Esquí Nordic es dies 6 e 7 de hereuèr

Era Deputacion de Lhèida a acuelhut era presentacion en ròda de premsa dera 37au Marxa Beret, qu’enguan se celebrarà es dies 6 e 7 de hereuèr amassa damb eth Campionat Europèu d’Esquí Nordic. Era estacion de Baqueira Beret demore era arribada e participacion d’entre 1.400 e 1.500 esportistes procedenti de tot eth mon.

Eth vice-president tresau dera Deputacion de Lhèida, Gerard Sabarich, a presentat aguest eveniment acompanhat per eth vicesindic deth Conselh Generau d’Aran, Luís Carlos Medina, peth coordinador dera pròva, Manu Caseny, e peth responsable de marqueting de Baqueira Beret, Pep Albós.

Sabarich afirmèc qu’era estacion de Baqueira Beret ei un clar referent de nhèu en Catalonha e tanben en Espanha e qu’era Deputacion de Lhèida tostemp collabòre damb aqueri eveniments esportius que dan a conéisher eth territòri ilerdenc, qu’en aguest cas ei era Val d’Aran e eth torisme de nhèu.
Aguesta pròva neishec en 1977 coma ua marcha populara. Enguan, includís era maraton d’estil classic e d’estil liure,puntuable entara Copa Catalana e eth Campionat d’Euròpa de Maratons d’Esquí, tau e coma a explicat  eth vicesindic deth Conselh Generau d’Aran, Luís Carlos Medina.

Egalaments, era Marxa Beret ei puntable entath Campionat d’Euròpa d’Esquí Nordic e era qualificacion des esportistes ei includida en calendari dera Federacion Internacionau d’Esquí de pròves populares e tanben en calendari Euroloppet (circuit europèu de marches de longa distància).
Se demore era participacion d’entre 1.400 e 1.500 esportistes, 40% que ne provien de païsi nordics, Alemanha, Àustria o Itàlia.
Eth dissabte 6 de hereuèr aurà lòc era pròva en estil liure de dues distàncies de 15km ena zòna de Orri e Beret e de 30 km ena zòna d’Orri, Beret e Gabatxos.

Eth dimenge 7 de hereuèr se disputarà era pròva de longa distància en estil classic. Damb un circuit de 10km ena zòna de Beret e Orri; de 21km ena zòna de Beret, Orri e Montgarri e fin finala en circuit de 42km, ena zòna de Beret, Orri, Montgarri e dirección Marimanha.
Aguesta pròva correspon ath Campionat d’Euròpa de Maratons d’Esquí e eth campion d’Euròpa serà qui artenhe eth comput des dus melhors tempsi des dues pròves de longa distància: era pròva de 30km (dissabte) e de 42km (dimenge).
Er an que ven, aguest Campionat d’Euròpa se celebrarà en Vuokatti, Finlàndia.