• Aguest maitin, era sindica d’Aran, eth secretari generau entath Rèpte Demografic, era directora dera Fundación Biodiversidad, eth director der IRTA e er alcalde de Vilamòs, amassa damb er equip tecnic deth projècte, an presentat Ovihuec.dat en la sede del Conselh Generau d’Aran

• A trauès d’aguest projècte pilòt, qu’ei dotat d’un pressupòst de lèu 2M€ per part der Estat, se crearà un ramat ovin e cabrum de titularitat publica en Vilamòs entà recuperar antics peishèus perduts, recuperar era gestion dera massa forestau e disminuir eth risc de propagacion d’incendis, ath madeish temps que s’apòste pera diversificacion economica, explorant vies de comercializacion e valoracion deth producte carnic e lactic d’aguest ramat, e s’apòste per emplec des naues tecnologies e era innovacion en sector ramadèr

Era sedença deth Conselh Generau d’Aran a acuelhut aguest maitin era presentacion deth projècte Ovihuec.dat, ena qu’an prenut part era sindica d’Aran, Maria Vergés, era directora dera Fundación Biodiversidad, Elena Pita, eth secretari generau entath Rèpte Demografic, Paco Boya, eth director generau der Institut de Recerca i Tecnologia Agroalimentaris (IRTA), Josep Usall, er alcalde de Vilamòs, Oriol Sala, atau coma eth coordinador deth projècte, Toni Dalmau e era rèsta der equip tecnic deth projècte, e a on a estat present tanben eth subdelegat deth govèrn en Lleida, José Crespín.

Er objectiu d’aguest projècte pilòt e transformador, dotat d’un pressupòst de lèu dus milions d’euròs e damb un periòde d’execucion de 22 mesi, ei crear un ramat ovin e cabrum de titularitat publica en Vilamòs coma dinamizador economic e de mantenement deth territòri, que pogue esdevier un modèl de referéncia e se pogue replicar en d’auti pòbles dera Val d’Aran, mès tanben ena rèsta der Estat.

A trauès d’Ovihuec.dat se poirà recuperar antics peishèus perduts pera disminucion d’activitat ramadèra, en tot recuperar era gestion dera massa forestau e assegurar eth suenh des nòstes montanhes, ath madeish temps que s’apòste pera diversificacion economica, explorant vies de comercializacion e valoracion deth producte carnic e lactic d’aguest ramat e creant lòcs de trabalh relacionadi damb era ramaderia en territòri.

Atau madeish, era implementacion des naues tecnologies aurà un papèr important, en tot emplegar-les entà poder controlar era localizacion e benèster des animaus, modernizant eth sector e  facilitant eth trabalh des ramadèrs e ramadères; mès tanben s’apòste pera recuperacion de coneishements ancestraus e se prebotjarà er escambi d’experiéncies entre ramadèrs, creant un airau de formacion practica entà pastors ena Val d’Aran.

En aguest sens, er alcalde de Vilamòs, manifestaue que: “aguest projècte ei ua grana oportunitat entath nòste municipi, pr’amor qu’a trauès d’aguest ramat comunau public poiram recuperar eth paisatge tradicionau, netejar finques qu’an estat aucupades pera vegetacion e atau crear un talhahuec qu’ajude a esvitar era propagacion de huecs”.

Era sindica d’Aran expressaue tanben que: “eth projècte Ovihuec.at ei ua grana oportunitat entath conjunt deth territòri, pr’amor, per un costat, mos ajude a diversificar era economia, en tot auançar enquia un modèl territoriau sostenible e innovador e, per aute, se hig ath projècte BoscAran, que tanben amiam a tèrme damb era Fundación Biodiversidad, coma mòstra dera apòsta deth govèrn d’Aran entà recuperar era gestion forestau des nòstes montanhes e poder arténher uns bòsqui mès resilients ath cambi climatic e as incendis forestaus”.

“Pendent aguesti ans, eth Ministerio para la Transición Ecológica y el Reto Demográfico (MITECO) a gestionat es Plans de Recuperacion, Transformacion e Resiliéncia (PRTR) dispausadi pera Union Europèa. Ua part d’aguesti recorsi an anat destinadi ath miei rurau e, en aguest sens, se tracte d’ua linha fòrça concrèta vinculada ara bioeconomia a on i auie 120M€ e a on i a auut un procés de concorréncia competitiva a trauès deth quau s’an escuelhut ath torn de 50 projèctes que permeten estacar eth coneishement scientific damb toti aqueri procèssi qu’an un impacte en miei naturau, en tot recuperar, en auest sens, ua activitat coma ei era ramaderia cercant un impacte positiu entath territòri. Damb aguest projècte en concrèt i a un procés de resiliéncia deuant es incendis forestaus e de recuperacion des entorns naturaus, ath madeish temps que s’apòste per impulsar era activitat ramadèra que s’a anat perdent damb eth pas des ans en territòri”, afirmaue eth secretari generau entath Rèpte Demografic, Paco Boya.

“Aguest projècte de bioeconomia forestau cèrque reequilibrar un espaci a on conviuen diferentes realitats: era agricòla, ramadèra, economica, sociau e toristica, damb eth doble objectiu de trabalhar ena prevencion d’incendis e fomentar era melhora dera biodiversitat”, a explicat eth director generau der IRTA, Josep Usall.

“Volem recuperar eth paisatge dera Val d’Aran entà activar e impulsar eth desvolopament sociau e economic dera ramaderia e valorizar aguesta activitat”, explicaue er investigador der IRTA e coordinador deth projècte, Toni Dalmau.

Ovihuec.dat compde damb eth supòrt dera Fundación Biodiversidad deth Ministerio para la Transición Ecológica y el Reto Demográfico (MITECO) en marc deth Plan de Recuperacion, Transformacion e Resiliéncia (PRTR), finançat pera Union Europèa – NextGenerationEU.