Era equipa de Santa Coloma ei eth prumèr viatge que realize eth sòn stage ena Val d’Aran en tot entrenar en Palai d’Espòrts de Vielha e en entorn naturau unic qu’aufrís Aran

Era Val d’Aran pòrte bèri ans en tot arrecéber era visita de diferentes equipes esportius d’elèit pendent era sason d’ostiu

Era equipa Marfil Santa Coloma compausat per 16 jogadors e eth còs tecnic e dirigit peth director generau deth club, Juan Carlos León, se trapen ena Val d’Aran en tot realizar eth stage de pretemporada enquiath pròplèu diuendres, dia 15 d’agost.

Era equipa s’a installat en Otèl Sol Vielha e pendent es pròplèus dies es jogadors combinaràn es sessions fisiques en un entorn naturau unic e damb temperatures doces, damb eth trabalh de pista que se realizarà en Palai d’Espòrts de Vielha.

Aué dimèrcles, dia 13 d’agost, era equipa a estat recebuda peth conselhèr de Governacion d’Aran, Frances Medan, e peth baile de Vielha e Mijaran, Àlex Moga, es quaus ath delà d’arregraïr-les era eleccion dera Val d’Aran entà realizar eth sòn stage les an desirat ua fòrça bona temporada.

Eth Marfil Santa Coloma aurà un prumèr assag contra era equipa Cafetería Casa Sandra Casa Aragón, guanhadora dera IVau. Edicion 30 ores Vila de Vielha, eth partit aurà lòc aué, dia 13 d’agost entàs 20h00 en Palai d’Espòrts de Vielha damb entrada gratuïta.

Eth diuendres, 15 d’agost, entàs 19h30, tanben en Palai d’Espòrts e damb entrada gratuïta, eth Marfil Santa Coloma, jogarà un aute amistós deuant er Umacón Saragossa.

Era Val d’Aran s’a anat plaçant enes darrèri ans coma era destinacion preferida per diuèrses equipes d’elèit de diferenti espòrts entà realizar part dera sua preparacion fisica mesi abans de començar era sason.