Reünion damb eth conselhèr de Territòri Damià Calvet en Conselh Generau d’Aran

Vielha, 14 de junhsèga de 2018.- Aué dissabte a prumèra ora deth maitin s’a mantengut ua naua reünion en Conselh Generau d’Aran sus era gestion der os.

Ara reünion a assistit eth conselhèr de Territòri e Mobilitat, Damià Calvet; eth director generau de Politiques Ambientaus, Ferran Miralles; eth director generau de Politiques de Montanha, Albert Alins e era deputada deth Parlament de Catalonha e membre dera Comission de Miei ambient e Sostenibilitat, Anna Geli. Per part deth Conselh Generau d’Aran a participat eth sindic d’Aran, Carlos Barrera e es conselhèrs de Territòri, José Antonio Boya e d’Agricultura, Ramaderia e Miei Naturau, José Enrique Arró.

Ena reünion s’an desvolopat es cinc punts aprovadi peth Plen deth Conselh Generau d’Aran deth passat 15 de junh e s’an dessenhat es objectius deth protocòu d’accions de gestion der os en Pirenèu, entà implementar es objectius non solaments en cas d’ossi aversius, mès entà qué tanben contemple era gestion globau ena zòna a compdar de 2019 un còp finalizat er actuau programa Piroslife.

Eth conselhèr de Territòri e Mobilitat a garantit era contunhitat per part dera Generalitat de Catalonha de totes es mesures de supòrt ara ramaderia extensiva de nauta montanha qu’actuauments s’apliquen ena zòna Os.

Pendent era amassada tanben s’a prenut er acòrd de mantier era comunicacion e coordinacion entre eth Departament de Territòri e Sostenibilitat e eth Conselh Generau d’Aran qu’a permetut préner era decision unanima de retirada deth territòri der os Goiat. En aguest sens se trabalhe intensaments entà, un còp artenhut er acòrd, incorporar aguesta decision as administracions des Estats Francesi e Espanhou, e as Comunitats Autonòmes d’Aragon e Navarra.

Un còp finalizat era reünion eth conselhèr Damià Calvet a contunhat era visita entath Palhars.

Comments are closed.