Vielha, 14 de junh de 2017.- Ager dimars se convoquèc ena sedença deth departament de Governacion, Administracions Publiques e Abitatge, era Comission Bilaterau Govèrn dera Generalitat- Conselh Generau d’Aran.
Era reünion siguec presidida pera conselhèra de Governacion, Meritxell Borràs, e peth sindic d’Aran, Carlos Barrera. Tanben assistiren eth vicesindic d’Aran, Luís Carlos Medina, e es conselhèrs Cesar Ruíz Canela, José Antonio Boya e Anna Díaz, en representacion deth Govèrn d’Aran, e Frances Boya, conselhèr d’UA.
Era Comission acordèc era transferéncia ath Conselh Generau d’Aran de 163.000 € entara melhora de camins, e era transferéncia dera gestion der elipòrt plaçat ena boca sud deth tunèl de Vielha.
Ena amassada s’aprovèc er acòrd de finançament entre era Generalitat de Catalonha e eth Conselh Generau d’Aran entath 2017, per un impòrt de 23.474.428,50 €, que supause un increment de 1.407.701,14 € respècte ath de 2016.
Entad aguest 2017, en àmbit de Salut, s’acordèc era transferéncia ath Conselh Generau d’Aran de 500.000 € destinadi ar ampliament der airau quirurgic der Espitau dera Val d’Aran, atau coma d’auta transferéncia de 250.000 € destinadi ath finançament ordinari der Espitau.
Ena reünion dera Comission Bilaterau, tanben se tractèc sus eth traspàs de competéncies ath Conselh Generau d’Aran entara creacion de federacions esportiues pròpries d’Aran, que se tròbe en fasa d’informacion per part des expèrts e pendent der informe per part deth departament de Presidéncia deth Govèrn dera Generalitat.
Fin finala, eth sindic d’Aran, reclamèc qu’er abans possible era Comission Bilaterau transferisque era dotacion economica corresponenta ara creacion de 30 places de residéncia geriatrica e 10 de centre de dia, entara naua residéncia geriatrica qu’eth Conselh Generau d’Aran vò bastir en Les.
En mots deth sindic d’Aran, Carlos Barrera, “entath Conselh Generau d’Aran es àmbits de salut e benestar son prioritaris. Er èish principau dera gestion deth Govèrn d’Aran son es persones, e damb aguest objectiu trabalham”.