Reünion transfronterèra deth Conselh Generau d’Aran damb era Sous-Préfecture de Saint Gaudens

Vielha, 16 de hereuèr de 2018.- Eth sindic d’Aran, Carlos Barrera, a mantengut aué ua reünion damb era Sous-Préfète de Saint-Gaudens, Marie Paule Demiguel, entà tractar diuèrsi ahèrs transfronterèri. Ara amassada tanben an assistit per part deth Conselh Generau d’Aran, era conselhèra de Torisme, Anna Díaz e eth conselhèr de Territòri, José Antonio Boya, e per part francesa, Alain Castel, president dera Communauté de Communes des Pyrénées Haut-Garonnaises e Joël Gros, vice-president du Pays Comminges Pyrénées.

Deuant era pròplèu redubertura dera carretèra de Saint Béat, un còp apariat es d’esvauçaments qu’afectauen aguesta carretèra, e dera pròplèu metuda en foncionament, en mes d’abriu, deth tunèl de Saint Béat, eth sindic d’Aran, arregraïc era accion dera Sra. Demiguel, ara ora de facilitar eth manteniment deth bon foncionament deth transpòrt collectiu transfronterèr entre era Val d’Aran e França. Un des aspèctes qu’a aucupat bona part dera amassada a estat justaments era nauta densitat de trafic de transpòrt pesat de mercaderies que supòrte era carretèra N-230 entre era Val d’Aran e era Communauté de Communes des Pyrénées Haut-Garonnaises, e de com actuar entà melhorar era circulacion e era seguretat vial entre Lhèida-Vielha-frontèra damb França, e dera frontèra en tà deuant, atau coma era manèra d’articular accions conjuntes entà auançar entà un projècte d’accès Routier transfronterèr que melhore era situacion actuau.

Eth sindic d’Aran, Carlos Barrera, expliquèc qu’era imminenta redubertura dera carretèra en Saint Béat, e era metuda en foncionament deth tunèl de Saint Béat, hè que se torne a veir damb fòrça preocupacion era situacion dera carretèra N-230 ath sòn pas pera Val d’Aran, damb un volum de pas de camions de gran tonatge que cada viatge va en aument. Eth sindic a auançat qu’era pròplèu setmana es Pompièrs d’Aran e pompièrs francesi realizaràn ua jornada de practiques en nau tunèl de Saint-Béat.

Era reünion de trabalh ena Sous-Préfeture de Saint-Gaudens, tanben a servit a abordar aspèctes religadi damb es diuèrsi projèctes transfronterèri compartidi, coma eth deth camin de Saint Jacques (Camin de Santiago) entre Tolosa e Aragon, ath delà des collaboracions en àmbit sanitari e des servicis de Pompièrs e Emergéncies.

Pendent era reünion tanben s’a apuntat era possibilitat d’auançar ena convalidacion e reconeishements de titolacions religades damb es activitats de montanha a trauès d’ETEVA, o en sector dera ostalaria, a trauès dera Escòla d’Ostalaria de Les, que permeten era mobilitat de professionaus a ua e d’auta part dera frontèra, e dera possibilitat d’impulsar un projècte de Parc Naturau Transfronterèr.

Fin finau s’a acordat era començada d’ua comission mixta de trabalh entà oficializar es relacions entre eth Conselh Generau d’Aran e era Communauté de Communes des Pyrénées Haut-Garonnaises.

Comments are closed.