Eth conselhèr de Territòri d’Aran, Eduardo Valdecantos, se reünís damb eth sous-préfet de Saint-Gaudens, Jean-Luc Brouillou, e damb eth president dera communauté de communes du canton de Saint-Béat, Jöel Gros, ara fin de trebalhar amassa en projèctes transfronterèrs
Eth sous-préfet de Saint-Gaudens, Jean-Luc Brouillou, eth conselhèr de Territòri d’Aran, Eduardo Valdecantos, e eth president dera communauté de communes du canton de Saint-Béat, Jöel Gros ena ròda de premsa
Eth Conselh Generau d’Aran a acuelhut ua reünion interinstitucionau entre eth govèrn aranés e es comunes deth Pirenèu francés, Saint-Gaudens e Saint-Béat, qu’a supausat er inici de diuèrsi projèctes tansfronterèrs.
Era reünion a estat presidida peth conselhèr de Territòri d’Aran, Eduardo Valdecantos, e a compdat damb eth sous-préfet de Saint-Gaudens, Jean-Luc Brouillou, e damb eth president dera communauté de communes du canton de Saint-Béat, Jöel Gros.
En transcors dera reünion, s’a parlat deth projècte europèu RisqHydro, deth hilat transfronterèr de deteccion de risqui idrologics, dirigit pera Deputacion de Lheida.
Tanben an parlat de trebalhar amassa entà méter en marcha un bus damb linha regular entre era Val d’Aran e es ciutats propères mès referenciaus de França. Aguest bus foncionarie un dia ara setmana ara fin de dar connexion as territòris vesins.
Eth sindic d’Aran, Carlos Barrera, eth sous-préfet de Saint-Gaudens, Jean-Luc Brouillou, eth conselhèr de Territòri d’Aran, Eduardo Valdecantos, eth president dera communauté de communes du canton de Saint-Béat, Jöel Gros e era conselhèra de Torisme, Comèrç e Consum d’Aran, Anna Díaz.
Eth conselhèr Eduardo Valdecantos a explicat qu’aguesta iniciativa “mos darie era oportunitat de dar-mos a conéisher en França coma territòri de qualitat e de referéncia de nhèu e de montanha, ath viatge qu’es aranesi poderien gaudir d’ua escapada tà França”.
Valdecantos a hijut “damb aguesta linha regular tanben se profitarie era connexion damb er aeropòrt de Toulouse e se poderien captar toristes alemanhs, anglesi, rusi…”.
Actuauments, eth Pirenèu francés dispause d’un circuit de bicicleta de lèu 120km, a on es familhes pòden gaudir dera bicicleta, ena reünion s’a defintit era intencion deth govèrn aranés de junhir era Val d’Aran ad aguest circuit en tot profitar eth camin reiau.